سورت النور (رکوع نمبر 1 تا 4) – ہندکو ترجمہ




سورت النور پارہ نمبر 18

1:- اے اک سورت اے جیڑی اَساں لائی اے اور اِس نے احکام آں نازل کیتا اور اساں اِس بچ واضح آیتاں نازل کیتیاں
2:- بدکار عورت تے بدکار مرد تُساں دوآں بیچوں ہر اک آں سو کوڑے مارو اور اُنہاں تے ترس نہ کھاؤ اللہ نا حکم چلاڑیں بچ اگر تُسیں اللہ اور یوم آخرت تے ایمان رکھنے او اور چائی نا اے کہ اُنہاں نی سزا نے ٹیم موجود ہو مسلماناں نی اک جماعت
3:- بدکار مرد یا عورت یا مشرکہ نے سوا نکاح نی کرنا اور بدکار عورت وی بدکار شرک کرڑیں آلے مرد توں سوا کِسے نال نکاح نی کرنی اور اے نکاح مومناں تے حرام کیتا گیا اے
4:- اور جیڑے لوک تہمت لاؤن پاکدامن عورتاں تے فر او اِس تے چار گواہ آنڑن او تے تُسیں اُنہاں اَسی کوڑے مارو اور تُسیں قبول نہ کرو کدے انہاں نی گواہی اے ای نافرمان لوک نوں
5:- مگر جنہاں لوکاں اِس توں بعد توبہ کر کدی اور انہاں اصلاح کر کدی تے بے شک اللہ بخشڑیں آلہ نہایت مہربان اے
6:- اور جیڑے لوک آپڑیاں بیویاں تے تہمت لاؤن او اور آپ انہاں توں سوا انہاں نے گواہ نہ ہون تے اِنہاں بیچوں ہر اک نی گواہی اے اے کہ اللہ نی قسم نال چار دفعہ گواہی دیون اوکہ او سچ آکھنے نوں
7:- اور 5 ویں دفعہ اے اے کہ اس تے اللہ نی لعنت ہووے اگر او کوڑ مارنے آلہ کوڑا اے
8:- اور اِس عورت توں ٹل جُلسی سزا اگر او چاردفعہ اللہ نی قسم کھا کہ گواہی دیوے کہ او مرد کوڑااے
9:- اور 5 ویں دفعہ آکھے کہ اِس عورت تے کہ مینڑیں تے اللہ نا غضب ہووے اگر او سچیاں بیچوں اے
10:- اگر تُساں تے نہ ہووے اللہ نا فضل تے اے مشکل حل نی ہونی اے اور اے کہ اللہ توبہ قبول کرڑیں آلہ اے

سورت النور نا رکوع نمبر 1 پارہ نمبر 18 نا رکوع نمبر 7

11:- بے شک جیڑے لوکاں بڈا بہتان لایا تُساں بیچوں ای اک جماعت اے تُسیں اِساں آپڑیں وسطے مندا گمان نہ کرو بلکہ او تُساں واسطے چنگا اے اُنہاں بیچوں ہر بندے وسطے اتنا غناہ اے جتنا اُس کیتا اے اور جس اِس نا بڈا طوفان چایا اُس وسطے بڈا عذاب اے
12:- جدوں تُساں او بہتان سنڑیا تے کیوں نی گمان کیتا مومن مرداں اور مومن عورتاں آپڑیں بارے بچ نیک اور اُنہاں کیوں نی آکھیا کہ اے کھلا بہتان اے
13:- او کیوں نہ لائے اِس تے چار گواہ پس جدوں انہاں گواہ نی آندے تے اللہ نے نیڑے اور ای کوڑےنوں
14:- اگر تُساں تے دنیا اور آخرت بچ اللہ نا فضل اور اُس نی رحمت نہ ہونی تے جِس شغل بچ تُسیں پئے او اُس بچ ضرور تُساں تے پیوے آ بڈا عذاب
15:- جدوں تُسیں اک دوئے کولوں سنڑ کے اُساں آپڑیں زباناں تے آنڑنے او اور تُسیں آپڑیں منہ نال آکھنے او جِس نا تُساں کوئی علم نی اور تُسیں اُساں ہلکی گل سمجھنے او حالانکہ اواللہ نے سامڑیں بہوں بڈی گل اے
16:- جدوں تُساں او سنڑیا تے کیوں نی آکھیا کہ اَساں وسطے زیبا نی کہ اَسیں اے او جئی گل کراں کہ اے اللہ توں پاک ایں اور اے بڈا بہتان اے
17:- اللہ تُساں نصیحت کرنا اے تُسیں اے او جیا کم کرو اگر تُسیں ایمان آلے او
18:- اور اللہ تُساں وسطے احکام صاف صاف بیان کرنا اے اور اللہ بڈا جانڑنے آلہ حکمت آلہ اے
19:- بے شک جیڑے لوک پسند کرنے نوں کہ مومناں بچ بے حیائی پھیلے اُنہاں وسطے دنیا تے آخرت بچ ڈاڈا عذاب اے اور اللہ جانڑنا اے جو تُسیں نی جانڑنے او
20:- اور اگر تُساں تے اللہ نا فضل اور اُس نی رحمت نہ ہووے تے کہ کج نی ہونا ایا اور اللہ شفقت آلہ نہایت مہربان اے

سورت النور نا رکوع نمبر 2 پارہ نمبر 18 نا رکوع نمبر 8

سورت النور پارہ نمبر 18

21:- اے مومنو ! تُسیں شیطان نی پیروی نہ کرو اور جیڑا شیطان نی پیروی کرنا اے تے شیطان حکم دینا اے بے حیائی اور مندے کم نا اور اگر تُساں نے اللہ نا فضل تے رحم نہ ہونا تے تُساں بیچوں اک آدمی وی پاک نی ہونا ایا لیکن اللہ جِساں چاہنا اے پاک کرنا اے اور اللہ سُنڑنے تے جانڑنے آلہ اے
22:- اور قسم نہ کھاؤ تُساں بیچوں فضیلت والے اور مال بچ وسعت آلے کہ او رشتہ داراں ، مسکیناں اور اللہ نی راہ بچ ہجرت کرڑیں آلیاں نی دینے اور چائی نا اے کہ او معاف کرن تے درگزر کرن کیا تُسیں نی چاہنے او کہ اللہ تُساں بخش چھڑے اور اللہ بخشڑیں آلہ نہایت مہربان اے
23:- بے شک جیڑے لوک پاکدامن انجان مومن عورتاں تے تہمت لانے نوں اُنہاں تے دنیا اور آخرت بچ لعنت اے اور انہاں وسطے بڈا عذاب اے
24:- جس دیاڑے انہاں نے ہتھ پیر تے زبان اُنہاں نے خلاف گواہی دیسی اور جانڑ کنسو نوں کہ اللہ ای بر حق اے
25:- گندی عورتاں گندے مرداں اور پاک عورتاں پاک مرداں وسطے نوں اے لوک اِس توں بری نوں جو او آکھنے انہاں وسطے مغفرت تے عزت آلی روزی اے ۔

سورت النور نا رکوع نمبر 3 پارہ نمبر 18 نا رکوع نمبر 9

26:- اے مومنو ! تسیں آپڑیں گھراں توں علاوہ دوئیاں نے گھراں بچ داخل نہ ہو ایتھے تک کہ تُسیں اجازت چاہ کنو اور تُسیں اِنہاں نے رہنڑیں آلیاں سلام کر کِنو اے تُساں وسطے چنگا اے تاکہ تُسیں نصیحت پکڑو
27:- فر اگر اِس گھر بچ تُسیں کِسے آں نا پاؤ تے ایتھے نہ بَڑو ایتھے تک کہ تُساں اجازت دتی جُلے اور اگر تساں آکھیا جُلے کہ مڑ جلو تے مڑ جلیا کرو اے ای تُساں وسطے پاک اے اور جو تُسیں کرنے او اللہ سیانڑنا اے
28:- تُساں تے اِس بچ کوئی غناہ نی اگر تُسیں اُنہاں گھراں بچ جُلو جتھے کوئی نہ رہنا ہووے اور جس بچ تُساں نی کوئی چیز ہووے اور اللہ ڈاڈا سیانڑنا اے جو تُسیں ظاہر کرنے او اور تُسیں چھپانے او
29:- آپ صہ آکھو مومن مرداں کہ آپڑیاں اکھیاں تَلے رکھن او اور آپڑیں شرمگاہواں نی حفاظت کرن او اے اُنہاں وسطے زیادہ ستھرا اے بے شک اللہ اِس توں باخبر اے جو او کرنے نوں
30:- اور آپ صہ آکھو مومن عورتاں کہ او وی تَھلے رکھن نگاہواں اور آپڑیں شرمگاہواں نی حفاظت کرن اود زینت نے مقام ظاہر نہ کرن اور چادراں گاٹے تے پائی رکھن او اور زینت نے مقام ظاہر نہ کرن او سوائے آپڑیں جنڑیں (خاوند) تے پیو ، سسر آپڑیں پتراں یا شوہر نے پتراں یا پراؤ نے پتراں آپڑیں پتیجے ، بھانجے یا مسلمان عورتاں یا کنیزاں یا او خدمتگار مرد جنہاں عورتاں نا غرض نی یا او جنک جنہاں ہالے تک عورتاں نے پردے نے معاملات نی سمجھ نی اور او آپڑیں پیر زمی تے نہ مارن او کہ جیڑی زینت چھپائی نے پہچانڑی جُلے اے ایمان آلیو تُسیں سارے اللہ آگے توبہ کرو تاکہ تُسیں دو جہاناں نی کامیابی پاؤ
31:- اور تُسیں نکاح کرو آپڑیں بیوا عورتاں نا اور آپڑیں نیک غلاماں اور کنیزاں نا اگر او تنگدست ہون او تے اللہ انہاں غنی کر چھڑسی آپڑیں فضل نال اللہ وسعت آلہ علم آلہ اے
32:- اور چاہیے کہ بچے رہو نوں او جیڑے نکاح مقدور نی پانے ایتھے تک کہ اللہ انہاں آپڑیں فضل نال غنی کر چھڑے اور اُنہاں بیچوں جیڑے تُساں نے غلام نوں اگر کج کن دے کہ آزادی چاہنے نوں تے آزادی چا دیو نے اگر تُسیں انہاں بہتری دیکھو اور اِس مال بیچوں اُنہاں دیو جیڑا اللہ تُساں دتا اے اور آپڑیں کنیزاں بدکاری تے مجبور نہ کرو اگر او پاکدامن رہنڑا چاہون او تُسیں دنیا نا سامان حاصل کرو اور جیڑا انہاں مجبور کرسی تے اللہ انہاں بیچاریاں نے مجبور ہونڑیں توں بعد بخشڑیں آلہ نہایت مہربان اے
33:- اور تحقیق اَساں تُساں دار لائے واضح حکم اور اُنہاں لوکاں نی مثالاں جیڑے تُساں توں پہلے گزرے اور نصیحت پرہیزگاراں وسطے

سورت النور نا رکوع نمبر 4 پارہ نمبر 18 نا رکوع نمبر 10

اپنا تبصرہ بھیجیں