سورت الفرقان (رکوع نمبر 1 تا 3) – ہندکو ترجمہ




سورت الفرقان پارہ نمبر 18

1:- بڈی برکت آلہ اے او اللہ جِس آپڑیں بندے تے فرق کرڑیں ، چنگے مندے بچ فیصلہ کرڑیں آلی کتاب (القرآن) لائی تاکہ او سارے جہاناں نے ڈراڑیں آلہ ہووے
2:- او جس نی بادشاہت اے آسمان اور زمی نی اور اُس کوئی پتر نی بنڑایا اور اُس نا کوئی شریک نی سلطنت بچ اور اُس ہر شے آں پیدا کیتا فر اُس نا اک مناسب اندازہ کیتا
3:- اور اُنہاں اِس توں علاوہ بنڑا کدے ہور معبود اور او کج نی پیدا کرنے بلکہ او آپ پیدا ہوئے نوں اور او آپڑیں وسطے کسے فیدے نقصان نا اختیار نی رکھنے او نہ کسے موت تے نہ زندگی نا
4:- اور کافراں آکھیا کہ اے کج وی نی صرف بہتان اے اُس نبی صہ اِساں گھڑ کدا اے اِس تے دوئے لوکاں اِنہاں نی مدد کیتی اے تحقیق او لِے آئے نوں ظلم اور جھوٹ تے
5:- اور اُنہاں آکھیا کہ اے پہلے لوکاں نی کہانیاں نوں اُس اُنہاں لکھ کدا اے پس او اُس تے سنڑائی جلنیاں نوں صبح تے شامی
6:- آپ صہ آکھو کہ اِساں اُس لایا اے جیڑا زمی تے آسماناں نے راز جانڑنا اے بے شک او بخشڑیں آلہ نہایت مہربان اے
7:- اور اُنہاں آکھیا کہ کے او جیا اے رسول جیڑا کھانڑاں کھانا اے اور ٹُرنا پھرنا اے بازاراں بچ اور اِس نال کوئی فرشتہ کیوں نی لتھا کہ او اِس نال ڈراڑیں آلہ ہووے آ
8:- یا اُس وسطے لایا جُلنا کوئی خزانہ یا اُس وسطے کوئی باغ ہونا کہ او اِس بیچوں کھانا اور ظالماں آکھیا کہ تُسیں پیروی کرو صرف جادو نال مارے آدمی نی
9:-اے نبی صہ تُسیں دیکھو اُنہاں تُساں وسطے کے او جیا گلاں کیتی نوں سو او بہک گئے نوں لہذا او کوئی راہ نی پا اکنے

سورت الفرقان نا رکوع نمبر 1 پارہ نمبر 18 نا رکوع نمبر 16

10:- بڈی برکت آلہ اے او اگر اللہ چاہوے تے تُساں وسطے اِس توں چنگا بنڑا چھڑے اے او جئےباغ جنہاں تھلے نہراں بگنیاں نوں او تُساں وسطے محل بنڑا چھڑے او
11:- بلکہ اُنہاں جھٹلایا قیامتی آں اور جِس قیامتی آں جھٹلایا اَساں اُس وسطے دوزخ تیار کیتا اے
12:- جدوں او دوزخ اُنہاں دیکھسی دور جگہ توں او اُساں جوش ماریا چنگھاڑنا سنڑسن او
13:- اور جدوں او دوزخ نی کِسے تنگ جگہ سٹےجُلسن او تے او اُتھوں موت آں بُلاسن او
14:- آکھیا جُلسی کہ اج اک موت آنہ بُلاؤ بلکہ تُسیں بلاؤ بہوں ساریاں موتاں
15:- آپ صہ آکھو کہ اے چنگی اے یا ہمیشگی نے باغات جنہاں نا وعدہ پرہیزگاراں نال کیتا گیا اے او اُنہاں وسطے جزا او مُڑنے نی جا اے
16:- اُس بچ اُنہاں وسطے جو او چاہسن موجود ہوسی ہمیشہ رہسن او اے اک وعدہ اے تُساں نے رب نے ذمے منگڑیں آلہ
17:- اور جِس دیاڑے او اِنہاں جمع کرسی اور جنہاں نی او پرستش کرنے نوں اللہ توں سوا تے او آکھسی کہ کیا تُساں مینڑیں اُنہاں بندیاں گمراہ کیتا یا او آپ ای راہے توں بھٹک گئے اے
18:- او آکھسن او توں پاک ایں اَساں وسطے سزاوار نی ایا کہ اسیں بنڑانے تینڑیں بندیاں تینڑیں توں سوا اوراں مددگار لیکن توں اِنہاں اور اِنہاں نے پیو دادے آں آسودگی دتی ایتھے تک کہ او تینڑیں یاد پہل گئے اور او ہلاک ہونڑیں آلے لوک اے
19:- پس اُنہاں تُساں نی گل جھٹلا چھڑی پس ہنڑ تُسیں عذاب پھیر اکنے او اور نہ آپڑیں مدد کر اکنے او اور جیڑا تُساں بیچوں ظلم کرسی اسیں اُساں بڈا عذاب چکھاساں
20:- اور اَساں تُساں توں پہلے رسول نی پیجے مگر یقیناً او کھانے اے کھانڑاں اور بازاراں بچ ٹُرنے پھرنے اے اور اَساں تُساں بیچوں کِسے آں بنڑایا دوئیاں وسطے آزمیش کیا تُسیں صبر کرسو اور تُساں نا رب دیکھڑیں آلہ اے

سورت الفرقان نا رکوع نمبر 2 پارہ نمبر 18 نا رکوع نمبر 17
پارہ نمبر 18 مکمل

21:- اور جیڑے لوک اساں نا ملڑیں نی امید نی رکھنے اُنہاں آکھیا اَساں تے فرشتے کیوں نی لائے گئے یا اسیں اللہ دیکھ اکنے تحقیق اُنہاں آپڑیں دِلاں بچ آپے آں بڈا سمجھیا اور سرکشی کیتی
22:- جس دیاڑے او دیکھسن او فرشتے اُس دیاڑے مومناں وسطے کوئی خوشخبری نی ہونی اور او آکھسن او کہ کوئی پناہ ہووے آ
23:- اور اَسیں متوجہ ہوساں اُنہاں نے کیتے ہوئے کماں دار تے اَسیں اُنہاں پراگندہ غبار آلی گل کر چھڑساں
24:- اِس دیاڑے جنت (بہشت) آلے بہوں چنگے ٹھکانڑیں اور چنگی آرام آلی جائی ہوسن او
25:- جِس دیاڑے بَدل (بادل) توں آسمان پھٹ جُلسی اور فرشتے لائے جُلسن او بہوں زیادہ
26:- اُس دیاڑے سچی بادشاہی اللہ نی طرفوں اے اور او دیاڑہ کافراں اُتے بہوں اوکھا ہوسی
27:- اور جِس دیاڑے ظالم آپڑیں ہتھاں کپ کے کھاسی اور آکھسی اے کاش میں رسول صہ نال راہ پکڑ کدی ہووے آ
28:- ہائے مینڑیں شامت کاش میں فلاں واں سنگی نہ بنڑاواں آ
29:- البتہ اُس ماں (مجھے) نصیحت توں بہکایا اُس توں بعد کہ جبکہ او مینڑیں کول پہنچ گئی اے ای اور شیطان انسان آں عین اُس ٹیم کہلا (اکیلا) چھوڑ جُلسی
30:- اور رسول صہ آکھسن کہ اے اللہ ! بے شک مینڑیں قوم اِس قرآن آں چھوڑنے نے قابل ٹھہرایا
31:- اِسطرح اَساں ہر نبی وسطے دشمن بنڑائے گنہگاراں بیچوں اور تُساں نا اللہ جہان اے ہدیت کرڑیں آلہ مددگار
32:- اور کافراں آکھیا کہ کیوں نہ اِس تے قرآن اک واری لتھا اِس طرح اَساں بتدریج لایا تاکہ اِس نال تُساں نے دِل باٹے کراں اور اَساں اِساں پڑھ کے سُنڑایا ٹھہر ٹھہر کے ۔
33:- اور او تُساں کول کوئی گل نی آنڑنے مگر اسیں تُساں ٹھیک گل اور چنگی وضاحت پہنچانے آں
34:- جیڑے لوک آپڑیں منہ نے پہار جہنم دار جمع کیتے جُلسن او او ہی لوک نوں بدترین مقام بچ اور بہوں بہکے راہ توں

سورت الفرقان نا رکوع نمبر 3 پارہ نمبر 19 نا رکوع نمبر 1

35:- البتہ اَساں موسیٰ عیہ آں کتاب دتی اور اُس نے پراؤ ہارون عیہ آں معاون بنڑایا ۔
36:- پس اَساں اُنہاں آکھیا کہ تُسیں دوئے جُلو اُس قوم دار جنہاں اَساں نی آیات آں نی منیا تے اَساں اُنہاں بہوں مندیوں ہلاک کرکے تباہ کیتا
37:- اور قومِ نوح عیہ جدوں رسول آں جھٹلایا تے اَساں اُنہاں غرق کر چھڑیا اور اَساں اُنہاں لوکاں وسطے عبرت بنڑایا اور اَساں ظالماں وسطے ڈاڈا عذاب تیار کیتا اے
38:- اور عاد اور ثمود اور کھو آلے اور اُنہاں بچ بہوں ساریاں جماعتاں
39:- اور اَساں ہر اکی وسطے مثال بیان کیتی مگر اُنہاں نصیحت نی پکڑی اور ہر اکی آں تباہ کر مٹا چھڑیا
40:- تحقیق اُو قوم لوط عیہ نی اُس بستی دار آئے جِس تے پتھراں نی بارش کیتی گئی تے کے او اُساں نی دیکھنے رہنے اے بلکہ او دوبارہ جی اُٹھڑیں نی امید نی رکھنے
41:- اور جدوں او تُساں دیکھنے نوں تے صرف ٹھٹھا کرنے نوں کہ اِے اے او جساں اللہ رسول بنڑا کے پیجیا اے
42:- نیڑے ای ایا کہ اُو اَساں اَساں نے معبود توں بہکا چھڑن آ اگر اَسیں اُس تے جمے نہ رہنے تے اور او جَلتی جانڑ کنسن او جدوں او عذاب دیکھسن او کونڑ اے سدھی راہ توں بدترین گمراہ
43:- کیا تُساں اُساں دیکھیا جِس آپڑیں خوشی آں معبود بنڑا کِدا تے کیا تُسیں اُس تے نگہبان ہو جُلسو
44:- کیا تُسیں سمجھنے او کہ اِنہاں بیچوں اکثر سُنڑنے یا عقل نال کم کننے نوں او نی نوں مگر چوپائیاں جئے بلکہ سدھی راہ توں بدترین گمراہ نوں

اپنا تبصرہ بھیجیں