سورت المریم (مکمل) – ہندکو ترجمہ




سورت مریم پارہ نمبر 16

1:- ک ، ہ، ی ، ع ، ص
2:- اے گل اے تُساں نے اللہ نی رحمت تے اُس نے بندے زکریا عیہ نی
3:- یاد کرو جدوں اُنہاں آپڑیں اللہ واں آہستہ جیا بُلایا
4:- اُنہاں آکھیا کہ اے اللہ بے شک بُڈھے ہونیوں مینڑیاں ہڈیاں کمزور ہو گئیا نوں اور مینڑیں سِرے نے نال چِٹے شعلے مارنے نوں اور میں کَدے وی اے اللہ تُساں کولوں مَنگ کہ محروم نہ ریا
5:- اور البتہ میں آپڑیں توں بعد آپڑیاں رشتہ داراں کولوں ڈرنا واں اور مینڑیں زنانی وی بانجھ اے تُسیں مَاں (مجھے) آپڑیں کولوں اک وارث چا دیو
6:- او وارث ہووے مینڑاں اور اولاد یعقوب عیہ نا اور اے اللہ اُساں پسندیدہ بندہ بنڑا چھڑو
7:- ارشاد ہویا کہ اے زکریا عیہ ! بے شک اَسیں تُساں اک جنکے (لڑکے) نی خوشخبری دینے آں اُس نا ناں یحییٰ عیہ اے اَساں اِس توں پہلے کِسے آں اِس نا ہم ناں نی بنڑایا
8:- اُنہاں آکھیا کہ اے اللہ مینڑاں پُتر کینجو ہوسی مینڑیں بیوی بانجھ اے اور میں بُڈھا ہو گیا واں بہوں
9:- اُس آکھیا اِسے طرح تینڑاں اللہ آکھنا اے اے کم مینڑیں تے آسان اے اور اِس توں میں تُساں پیدا کیتا جبکہ توں کج وی نی ایا ویں
10:- اُس آکھیا کہ اے مینڑیں وسطے کوئی نشانی مقرر کر چھڑو فرمایا کہ تینڑیں نشانی اے اِے کہ توں 3 دیاڑے تک لوکاں نال گل نی کرڑیں
11:- فر او محراب بیچوں آپڑیں قوم دار نکل آئے تے اُس اُنہاں دار اشارہ کیتا کہ اُس نی پاکی بیان کرو صبح تے شامی
12:- ارشاد الہٰی ہویا کہ اے یحیٰی عیہ کتاباں باٹا پکڑ کِنو اور اَساں اِنہاں بچپن بچ ای نبوت و دانائی دے چھڑی
13:- اور آپڑیں کولوں شفقت تے پاکی عطا کیتی اور پرہیزگار ایا
14:- اور او آپڑیں ماؤ پیو نال چنگا سلوک کرڑیں آلہ ایا اور نی ایا نافرمان
15:- اور سلامتی ہو اُس دیاڑے تے جِس دیاڑے او پیدا ہویا اور جس دیاڑے مرسی اور جس دیاڑے دوبارہ جینا کیتی جُلسی

سورت مریم نا رکوع نمبر 1
پارہ نمبر 16 نا رکوع نمبر 4

16:- اور قرآن بچ مریم عیہ نا زکر یاد کرو جدوں او آپڑیں گھر والیاں نالوں الگ ہو گئیاں اک مشرق دار مکان بچ
17:- فر اُنہاں اُس داروں پردہ پاچھڑیا فر اَساں اُس دار فرشتے آں پیجیا او اُنہاں وسطے اک آدمی نی شکل بنڑ کے آیا
18:- او بولیاں کہ میں تینڑیں توں اللہ نی پناہ بچ آنی آں اگر پرہیزگار ایں تے ایتھوں ہٹ جُل او
19:- اُس آکھیا کہ اِس توں سوا نی کہ میں تینڑیں اللہ نا پیجیا ہویا واں اور میں تُداں اک پاک جَنک (لڑکا) دیواں
20:- او بولیاں کہ مَاں (مجھے) لڑکا کینجو ہوسی کہ نہ مَاں کسے بندے ہتھ لایا اے اور نہ ای میں بدکار آں
21:- اُس آکھیا کہ اللہ نا فیصلہ اے اللہ آکھیا اے کہ اے مینڑیں تے آسان اے تاکہ اَسیں اُساں لوکاں وسطے اک نشانی بنڑاواں اور آپڑیں طرفوں رحمت اے اور اے کہ تہہ شدہ کم اے
22:- فر اُنہاں حمل رہ گیا تے او اُساں کِن کے دور اک جگہ چلی گئیاں
23:- فر درد اُنہاں کجھور نے بوٹے کول کِن آیا اور اُنہاں آکھیا کہ اے کاش میں اِس توں پہلے مر جُلنی اور میں ہو جُلنی بھولی بسری
24:- پس اُنہاں اُنہاں نے تَلوں وادی بیچوں اک فرشتے آواز دِتی کہ گھبراؤ نہ تینڑیں اللہ تینڑیں تَلوں اک چشمہ کڈ چھڑیا اے
25:- اور کجھور نے تنے آں آپڑیں دار ہلاؤ تے تازہ کجھوراں تُساں دار ٹہہ پیسن او
26:- پس توں کھا اور پی تے اکھیاں ٹھنڈیاں کر فر اگر توں کِسے آدمی آں دیکھیں تے آکھ او کہ میں رحمان وسطے روزے نی نذر مَنی اے پس اج ہرگز بندے نال گل نہ کرنی او
27:- فر او اُساں چا کے آپڑیں قوم کول آئی او بولے کہ اے مریم عیہ توں آندی اے غضب نی چیز
28:- اے ہارون عیہ نی پہینڑ (بہن) تینڑاں پیو (والد) مَندا بندہ نی ایا اور نہ تینڑیں ماں بدکار ای
29:- تے مریم عیہ بچے دار اشارہ کیتا کہ او بولے اُنہاں آکھیا کہ اَسیں گود بچ بچے نال کینجو گل کراں
30:- بچے آکھیا کہ بے شک میں اللہ نا بندہ واں اُس مَاں (مجھے) کتاب دتی اے اور نبی بنڑایا اے
31:- اور جتھے کدھرے میں ہوساں مَاں (مجھے) بابرکت بنڑایا اے اور جدوں تک میں جینا واں مَاں حکم دتا سو نماز تے زکوٰۃ نا
32:- اور آپڑیں والدہ نال چنگا سلوک کرنڑیں نا او اُس مَاں (مجھے) سرکش اور بدنصیب
33:- اور سلامتی ہووے مینڑیں تے اور جس دیاڑے میں پیدا ہویا واں اور فر جِس دیاڑے میں مرساں اور جس دیاڑے میں دوئی واری جینا ہوکے اُٹھساں او
34:- اے نوں عیسٰی عیہ ابن مریم عیہ سچی گل جِس بچ لوک شک کرنے نوں
35:- اللہ وسطے سزاوار نی او کہ او کوئی پتر بنڑاوے او پاک اے جدوں او کِسے کم نا فیصلہ کرنا اے او آخنا اے کہ “ہوجا” بس او “ہو جُلنا” اے
36:- اور بے شک اللہ مینڑاں تے تُساں نا رب اے پس اُس نی عبادت کرو اے ای سدھی راہ اے
37:- اہل کتاب فرقیاں اختلاف کیتا آپس بچ پس خرابی اے کافراں وسطے قیامتی نے بَڈے دیاڑے نی حاضری نال
38:- کے کُج سنڑ سن اور کے کج دیکھسن او جدوں اَساں نے سامڑیں آسن او لیکن اج نے دیاڑے ظالم کھلی گمراہی بچ نوں
39:- اور آپ صہ اُنہاں حسرت نے دیاڑے توں ڈراؤن جدوں کم نا فیصلہ کر دتا جُلسی لیکن او غفلت بچ نوں اور ایمان نی آنڑنے او
40:- بے شک اَسیں وارث ہوساں زمی نے اور جو کُج اُس بچ اے او اَساں دار لوٹایا جُلسی او

سورت مریم عیہ نا رکوع نمبر 2
پارہ نمبر 16 نا رکوع نمبر 5

41:- اور کتاب بچ ابراہیم عیہ آں یاد کرو بے شک او سچے نبی اے او
42:- جدوں اُنہاں آپڑیں والد آں آکھیا کہ تُسیں کیوں اُس نی پوجا کرنے او جیڑا نہ کُج سنڑنا اے نہ دیکھنا اے نہ ای تُساں نے کج کم آنا اے
43:- اے ابا بے شک مینڑیں کول وحی آئی اے جیڑی تُساں کول نی آئی بس مینڑیں گل مَنو میں تُساں ٹھیک سدھا راہ دَسساں او
44:- اے ابا شیطان نی پوجا نہ کرو بے شک شیطان رحمان نا نافرمان اے
45:- اے ابا میں ڈرنا واں رحمان نا عذاب تُساں نہ آ پکڑے فر توں ہو جُلیں شیطان نال او
46:- اُس آکھیا کہ اے ابراہیم عیہ ! کیا توں مینڑیں معبوداں توں روگراں ایں اگر توں نہ باز آیا تے میں بے شک تُداں سنگسار کر چھڑساں
47:- اور مَاں (مجھے) اک مدت وسطے چھوڑ دے ابرہیم عیہ آکھیا کہ تینڑیں تے سلام ہووے میں ہالے وی تینڑیں وسطے اللہ کولوں بخشش منگساں بے شک او مینڑیں تے مہربان اے
48:- میں کنارہ کشی کرنا واں تُساں توں اور اللہ توں سوا جس نی تُسیں پوجا کرنے او اور میں آپڑیں رب نی عبادت کرساں امید اے کہ میں آپڑیں رب نی عبادت توں محروم نہ ہونا
49:- فر جدوں او ابراہیم عیہ اُنہاں توں اور اللہ تو سوا جنہاں نی او پوجا کرنے اے کنارہ کش ہو گئے تے اَساں اُنہاں اسحاق عیہ اور یعقوب عیہ عطا کیتے اور اُنہاں ساریاں اَساں نبی بنڑایا
50:- اور اَساں آپڑیں رحمت نال اُنہاں بہوں کج دتا اور اَساں اُنہاں نا زکر جمیل بہو ں اُچا کیتا

سورت مریم نا رکوع نمبر 3
پارہ نمبر 16 نا رکوع نمبر 6

51:- اور کتاب بچ موسیٰ عیہ آں یاد کرو بے شک او برگزیدہ اے اور رسول تے نبی اے
52:- اور اَساں اُنہاں کوہ طور نی سجی سیڈ توں بُلایا اور اَساں اُنہاں راز دسڑیں وسطے نیڑے بُلایا
53:- اور اَساں اُنہاں آپڑیں رحمت نال اُنہاں نا پرا ہارون عیہ دِتا
54:- اور کتاب بچ اسماعیل عیہ آں یاد کرو بے شک او وعدے نے سچے تے رسول تے نبی اے
55:- اور او آپڑیں گھر آلیاں نماز تے زکوٰۃ نا حکم دینے اے اور او اللہ نے کول پسندیدہ اے
56:- اور کتاب بچ ادریس عیہ آں یاد کرو بےشک او سچے نبی اے
57:- اور اَساں اُنہاں اک اُچے مقام تے چا کِدا
58:- اے اِے نوں نبیاں بیچوں او جنہاں اُتے اللہ انعام کیتا اولادِ آدم عیہ بیچوں اور اُنہاں بیچوں جنہاں اَساں نوح عیہ نال کشتی بچ سوار کیتا اور ابراہیم عیہ اور اولاد یعقوب عیہ بیچوں اور انہاں بیچوں جنہاں اَساں ہدیت دتی اور چنڑیا جدوں اُنہاں تے رحمان نی آیتاں پڑھیا جُلنیاں نوں او زمی تے ٹہہ پینے نوں سجدہ کرنے تے رونے ہوئے
( آیت سجدہ)
59:- فر اُنہاں توں بعد چند ناخلف جانشین ہو ئے اُنہاں نماز گُما چھڑی اور خواہشاتِ نفس نی پیروی کیتی پس جَلتی اُنہاں گمراہی نی سزا مِلسی
60:- مگر جِس توبہ کیتی اور چنگے کم کیتے بس اے ای لوک نوں جیڑے جنت بچ جُلسن او اور زرہ جیا وی اُنہاں نا نقصان نی کیتا جُلنا او
61:- ہمیشگی نیا باغاں بچ جنہاں نا وعدہ رحمان غائیبانہ آپڑیں بندیاں نال کیتا بے شک اُس نا وعدہ آنڑے آلہ اے
62:- اور اِس بچ سلام توں سوا کوئی بہودہ گل نہ سُنڑے اور اُنہاں وسطے اِس بچ صبح شامی نا رزق اے
63:- اے او جنت اے جس نا اُس بندے آں وارث بنڑاساں جیڑے بندے پریزگار ہوسن او
64:- اور فرشتیاں آکھیا کہ اَسیں تُساں نے رب نے حکم توں بغیر نہ لہینے (اُترنے) اس وسطے جو اساں نے اگے اے اور اَساں نے پچھے اے او جو اِس نے درمیان اے اور تُساں نا رب پہلڑیں آلہ نی او
65:- او رب اے آسمان نا اور زمی نا اور جیڑا اُنہاں نے درمیان اے پس تُسیں اُس نی عبادت کرو اور اُس نی عبادت تے ثابت قدم رہو کیا توں اُس نا کوئی ہم نام سیانڑنا ایں

سورت مریم نا رکوع نمبر 4
پارہ نمبر 16 نا رکوع نمبر 7

66:- اور کافر انسان آکھنا اے کہ کیا جدوں میں مر گیا تے فر میں جینا کر کے زمی توں کڈیا جُلساں
67:- کیا انسان یاد نی کرنا کہ اَساں اِس توں پہلے پیدا کیتا جبکہ او کج نی ایا
68:- سو تُساں نے رب نی قسم اَسیں اُنہاں تے شییطان آں ضرور جمع کرساں فر اَسیں اُنہاں ضرور حاضر کرساں جہنم کول گھٹنیاں (گوڈیاں ) نے پہار ٹھہٹھے (گرے) ہوئے
69:- فر ہر گروہ بیچوں اَسیں اُنہاں ضرور چھک کے کڈساں اور جیڑا اُنہاں بچ اللہ رحمان نال بہوں سرکشی کرڑیں آلہ ایا
70:- فر البتہ اسیں اُنہاں توں خوب واقف آں جیڑے اُس جہنم بچ داخل ہونڑیں نے زیادہ مستحق نوں
71:- اور تساں بچ ستی نی مگر اُسا ہر اک آں ایتھوں گزرنا ہوسی اے تُساں نے رب پروردگار تے لازم مقرر کیتا ہویا اے
72:- فر اسیں اُنہاں لوکاں نجات دیساں جنہاں پرہیزگاری کیتی اور اسیں ظالماں اِس بچ چھوڑساں گوڈیاں (گھٹنوں) نے پہار ٹھہٹھے ہوئے
73:- اور جدوں اُنہاں تے مینڑیاں واضح آیتاں پڑھیا جُلنیاں نوں تے جنہاں کفر کیتا او ایمان لاڑیں والیاں آکھنے نوں کہ دوآں فریقاں بیچوں کِس نا مقام چنگا اور مجلس چنگی اے
74:- اور اُنہاں توں پہلے اسیں کتنے ای گروہ ہلاک کر چُکے آں او سامان تے نمود بچ بہوں چنگے اے
75:- آکھو کہ جیڑا گمراہی بچ اے تے اُساں اللہ گمراہی بچ ہور ٹہل دینا اے ایتھے تک کہ او دیکھ کنسن او خواہ عذاب یا خواہ قیامت جس نا اُنہاں نال وعدہ کیتا جُلنا اے پس ہنڑ او جانڑ کنسن او کہ کونڑ اے بدتر مقام بچ اور کمزور تر لشکر بچ
76:- اور جنہاں لوکاں ہدیت حاصل کیتی اللہ اُنہاں ہور زیادہ ہدیت دینا اے اور تساں نے پروردگار نے نیڑے باقی رہنڑیں آلیاں نیکیاں بہتر نوں با اعتبار ثواب اور بہترین اعتبار انجام
77:- پس کیا توں اُس بندے آں دیکھیا اے جس اَساں نے حکم نا انکار کیتا اے اور آکھیا کہ میں ضرور مال و اولاد دتا جُلساں
78:- کیا او غیب تے مطلع ہو گیا اے یا اُس اللہ رحمان توں چا کدا اے کوئی عہد
79:- ہر گز جو او آکھنا اے ہنڑ اسیں لکھ کنساں عذاب اور اُساں کماں بدا کنساں
80:- اور اسیں وارث ہوساں جو او آکھنا اے اور او اساں کوک کلا (اکیلا) آسی
81:- اور اُنہاں اللہ توں سوا کسے ہور آں معبود بنڑا کِدا تاکہ او اِنہاں وسطے مؤجب عزت ہون او
82:- ہر گز نی جلتی ای او انہاں نی بندگی توں انکار کرسن او اور انہاں نے مخالف وی ہو جُلسن او

سورت مریم نا رکوع نمبر 5
پارہ نمبر 16 نا رکوع نمبر 8

83:- کیا تُساں نی دیکھیا کہ اَساں شیطان پیجے نوں کافراں تے او اُنہاں بہوں اُکسانے رہنے نوں
84:- سو تُسیں اُنہاں تے عذاب لینڑیں نی جَلتی نہ کرو اسیں تے صرف اُنہاں نے دیاڑے گنڑنے پئے آں
85:- یاد کرو جِس دیاڑے اسیں پرہیزگاراں اللہ دار مہمان بنڑا کے جمع کرساں
86:- اور اسیں گنہگاراں ہانک کے کھڑساں جہنم دار تَریائے
87:- او شفاعت نا اختیار نی رکھنے او سوائے اِس نے کہ جِس رحمان توں کدا ہوئے اقرار
88:- اور او آکھنے نوں کہ رحمان نے پُتر بنڑا کِدا اے
89:- تحقیق تُساں جیباں (زبان) تے مندی گل آندی اے
90:- بہوں جَلتی اے کہ آسمان پھٹ جُلے ، زمی ٹکڑے ٹکڑے ہو جُلے اور پہاڑ زرہ رزہ ہو کہ ٹہہ جُلن او
91:- کہ اُنہاں اللہ وسطے منسوب کیتا پتر او
92:- جبکہ رحمان نی شان نی کہ او پتر بنڑاوے
93:- نی کوئی جیڑا آسمان بچ یا زمی بچ مگر رحمان نے حضور بندہ ہو کے آنا اے
94:- اُس اِنہاں گھیر کِدا اور گِنڑ کے انہاں نا شمار کر کِدا
95:- اور اُنہاں بیچوں ہر اک قیامتی نے دیاڑے اِس نے سامڑیں کَلا آسی
96:- بے شک جیڑے لوک ایمان کِن آئے اور اُنہاں چنگے کم کیتے اُنہاں وسطے پیدا کرسی رحمان بدلاں بچ محبت
97:- پس اِس توں سِوا نی کہ اَساں قرآن آں تُساں نی زبان بچ آسان کر چھڑیا تاکہ اِس نال آپ صہ پرہیزگاراں خوشخبری دیو اور جھگڑالو لوکاں اِس توں ڈراؤ
98:- اور اِنہاں توں پہلے اَساں کتنے ای لوک ہلاک کر چھڑے کیا تُسیں اُنہاں بیچوں کسے آں دیکھنے او یا اُنہاں نی آہٹ سنڑنے او

سورت مریم نا رکوع نمبر 6
پارہ نمبر 16 نا رکوع نمبر 9

سورت مریم مکمل

اپنا تبصرہ بھیجیں