سورہ الطحہ (رکوع نمبر 1 تا 4) – ہندکو ترجمہ




سورت طٰہٰ پارہ نمبر 16

1:- طٰہٰ
2:- اَساں تُساں تے قرآن اِس کرکے نی لایا کہ تُسیں مشقت بچ پے جُلو
3:- مگر اُس وسطے نصیحت اے جیڑا ڈرنا اے
4:- لتھا اے اُس نی طرفوں جِس زمی تے اُچے آسمان بنڑائے
5:- رحمان عرش تے قیم ہویا
6:- اُسی وسطے اے جو کج آسمان بچ تے زمی بچ اور اُنہاں نے درمیان بچ اور سِنی (گھیلی) مٹی (آخری زمی) نے تھلے اے
7:- اگر توں بلا کہ آکھیں گل تے او بے شک چھپی ہوئی گل بھید وی سیانڑنا اے
8:- اللہ توں سوا کوئی معبود نی سارے چنگے نام اُسی وسطے نوں
9:- اور کیا تُساں کول موسیٰ عیہ نی خبر آئی
10:- جدوں اُنہاں آگ دیکھی تے آپڑیں گھر آلیاں آکھیا تُسیں ٹھہرو بے شک میں اگ دیکھی اے شید میں تُساں کول انگار کِن آنڑاں یا میں اگ توں راہ نا پتا پا کناں
11:- پس جدوں او اُتھے آئے تے آواز آئی اے موسیٰ !
12:- بے شک میں ای تُساں نا رب آں تے آپڑیاں جُتیاں (جوتے) لا کِنو تُسیں طُویٰ نے پاک میدان بچ او
13:- اور میں تُساں پسند کیتا اے پس جیڑی وحی کیتی جُلے اُس دار کَن لا کے سُنڑو
14:- بے شک میں ای اللہ واں مینڑیں توں سوا کوئی معبود نی پس مینڑیں عبادت کرو اور مینڑیں یاد بچ نماز قیم کرو
15:- بے شک قیامت آنڑیں آلی اے میں چاہنا واں کہ اُساں پوشیدہ رکھاں تاکہ ہر بندے آں بدلہ دِتا جُلے اُس کوشش نا جو او کرنے اے
16:- پس تُداں اِس توں او نہ روکے جیڑا اِس تے ایمان نی رکھنا اور آپڑیں خواہش پچھے پیا ہویا اے فرتوں بلاک ہو جُلسیں
17:- اے موسیٰ عیہ ! اے تینڑیں سجے ہتھے بچ کے وے
18:- اُنہاں آکھیا کہ اے عصا اے اِس نال میں ٹیک لانا اور میں اِس نال پتر چھنڈنا واں آپڑیں بکریاں تے اور اس بچ مینڑیں ہور وی کئی فیدے نوں
19:- اُس آکھیا کہ اے موسیٰ عیہ اِساں زمی تے سَٹ چھڑو
20:- پس اُنہاں سٹیا تے او نسنا ہویا سپ ناگ بنڑ گیا
21:- اللہ آکھیا کہ اِساں پکڑ اور نہ ڈر اسیں اِساں جَلتی اِس نی پہلی حالت بچ کر چھڑساں
22:- اور آپڑیں ہتھ آپڑیں بغل بچ لا کِنوں او کسے عیب توں بغیر چٹا چمکنا یویا نکلسی اے دوئی نشانی اے
23:- تاکہ اسیں تُساں دساں آپڑیں بڈیاں نشانیاں بیچوں
24:- توں فرعون دار جُل بے شک او سرکش ہو گیا اے

سورت طٰہٰ نا رکوع نمبر 1
پارہ نمبر 16 نا رکوع نمبر 10

25:- موسیٰ عیہ آکھیا اے اللہ مینڑیں وسطے مینڑاں سینہ کھلا کر چھڑو
26:- اور مینڑیں وسطے مینڑاں کم آسان کر چھڑو
27:- اور مینڑیں زبان نی گنڈ (گرہ) کھول چھڑو
28:- کہ او مینڑیں گل سمجھ کنوں نوں
29:- اور مینڑیں وسطے مینڑیں خاندان بچ معاون (وزیر) بنڑا دیو
30:- مینڑاں پرا ہارون عیہ
31:- اس نال مینڑیں طاقت (کنڈ) باٹی کر چھڑو
32:- اور اُساں مینڑیں کمے بچ شریک کر چھڑو
33:- تاکہ اسیں کثرت نال تینڑیں تسبیح کراں
34:- اور کثرت نال تُساں یاد کراں
35:- بے شک تُسیں اساں ڈاڈا دیکھنے او
36:- اللہ آکھیا کہ اے موسیٰ عیہ جوتوں منگیا تحقیق تداں چا دتا اے
37:- اور تحقیق اَساں تینڑیں تے اک وار ہور وی احسان کیتا اے
38:- جدوں اَساں تینڑیں والدہ او الہام کیتا جیڑا الہام کرنا ایا
39:- کہ توں اِساں بکسے بچ دریا بچ سٹ چھڑو فر دریا اُساں ساحل تے کِن کھڑسی مینڑاں اور اُس نا دشمنڑ اُساں چاکنسی اور میں پاچھڑی تُساں تے محبت آپڑیں طرفوں کہ مخلوق تُساں نال محبت کرے تاکہ توں مینڑیں سامڑیں پرورش پاویں
40:- اور یاد کر جدوں تینڑیں بہن جُلنی اے ای پئی تے فرعون آں آکھنی کہ کیا میں تُساں اُس نا پتا دَساں جیڑا اِس نی پرورش کرے پس اَساں تداں تینڑیں ماں چا دتی تاکہ اُس نیا اکھیاں ٹھنڈیاں ہون اور او غم نہ کرے اور توں اک بندے آں قتل کر چھڑیا تے اَساں تُداں غم توں نجات دتی اور تُداں کئی آزمائیشاں بیچوں کڈیا فر تُوں کئی سال مدین بچ ریا ایں فر اے موسیٰ عیہ توں مقرر ٹیم (تقدیر الٰہی ) آیا ایں
41:- اور میں تُداں خاص آپڑیں وسطے بنڑایا اے
42:- توں تے تینڑاں پرا دوئے جُلو مینڑیں نشانیاں نال اور مینڑیں یاد بچ سستی نہ کرے
43:- تُسیں دوئے فرعون کول جُلو بے شک او سرکش ہو گیا اے
44:- تُسیں اُساں نرم گل آکھو شید او نصیحت پکڑ جُلے یا ڈر جُلے
45:- او بولے اے اللہ بے شک اسیں ڈرنے آں کہ کدرے او اَساں نال زیادتی نہ کرے یا حد توں نہ بد جُلے
46:- اُس آکھیا تُسیں نہ ڈرو بے شک تُساں نال آں اور میں سنڑنا تے دیکھنا واں
47:- پس اُس کول جُلو تے آکھو کہ اَسیں دوئے اللہ نے پیجے آں وی اور بنی اسرائیل آں اَساں نال پیج چھڑ اور اُنہاں سزا نہ دے اَسیں تینڑیں کول اللہ نی نشانی کِن کے آئے آں اور سلام ہوئے اُنہاں تے جنہاں ہدیت نی پیروی کیتی
48:- بے شک اَساں دار وحی کیتی گئی اے کہ عذاب اے اُس تے جِس جھٹلایا اور منہ پھیریا اے
49:- اُس آکھیا کہ اے موسیٰ عیہ تینڑاں رب کونڑ اے
50:- موسیٰ عیہ آکھیا کہ مینڑاں رب او اے جِس ہر چیز آں اس نی شکل و صورت دتی فر اُس نی رہنمائی کیتی
51:- اُس آکھیا کہ فر پہلی جماعتاں نا کے حال اے
52:- موسیٰ عیہ آکھیا اِس علم مینڑیں رب کول کتاب بچ اے مینڑاں اللہ نہ غلطی کرنا اے تے پہلنا اے
53:- اور جس زمی آں تُساں وسطے بچھونا بنڑایا اور تُساں وسطے چلائے اس بچ راہ اور آسمان توں پاڑیں لایا فر اِس بچ مختلف قسماں نیاں سبزیاں کڈیاں
54:- تُسیں کھاؤ اور مال ڈنگر چراؤ بے شک اِس بچ عقل آلیاں وسطے نشانیاں نوں

سورت طٰہٰ نا رکوع نمبر 2
پارہ نمبر 16 نا رکوع نمبر 11

55:- اِس زمی بیچوں اَساں تُساں پیدا کیتا اور اِس بچ ای تُساں مڑنا اے اور اِسے توں تُساں دوئی دفعہ کڈساں
56:- اَساں فرعون آں ساریاں نشانیاں دسیاں اور تے اس فر وی نی منیا اور انکار کیتا سو
57:- اُس آکھیا کہ اے موسیٰ ! کیا توں اَساں کول آیا ایں کہ اساں جادو نال اَساں نے مُلک بیچوں کڈ چھڑیں
58:- پس اَسیں تینڑیں مقابلے بچ ضرور آنڑساں اِس جیا اک جادو پس اَساں نے تے آپڑیں درمیان اک ٹیم رکھ کِن نہ اَسیں اِس تو نَسنے آں تے نہ ای تواب اک ہموار میدان بچ مقابلہ ہوسی
59:- موسیٰ عیہ آکھیا کہ وعدہ میلے نا دیاڑہ اے اور لوک دن چڑھنے نے ٹیم تے جمع کیتے جُلسن او
60:- فر مڑ گیا فرعون اور اُس جادو نا سامان جمع کیتا اور فر آیا
61:- موسیٰ عیہ آکھیا کہ تُساں تے خرابی ہووے اور اللہ تے نے گھڑو کوڑ کہ او تُساں عذاب نال ہلاک کر چھڑے اور جِس کوڑ ماریا او نامراد ہویا
62:- تے او جادو گر آپڑیں کمے بچ آپے بچ کُلنے آں لگ گئے اور اُنہاں چھپ کہ مشورہ کیتا
63:- او آکھڑیں آں لگ گئے کہ اے دوئے جادو گر نوں اور چاہنے نوں کہ تُساں تُساں نی زمی بیچوں کڈ چھڑن او آپڑیں جادو نال اور تُساں نا چنگا طریقہ کِن جُلن او بابود کر چھڑن او
64:- لہذا آپڑیں داؤ اکھٹے کر کنو فر صف بنڑ کے آؤ اور تحقیق اج او ای کامیاب ہوسی جیڑا غالب رہسی
65:- او بولے اے موسیٰ عیہ یا تُسیں داؤ پاؤ یا فر اسیں پہلے پانے آں
66:- اُس آکھیا کہ نہیں تُسیں پاؤ تے نا گہاں اُنہاں نیاں رسیاں اور اُنہاں نیاں سوٹیاں موسیٰ عیہ نے خیال بچ اینجو آئیاں کہ جینجوں او نسنیاں نوں پئیاں
67:- تے موسیٰ عیہ آپڑیں دِلے بچ کج خوف محسوس کیتا
68:- اَساں آکھیا تُسیں ڈرو نہ تُسیں ای غالب رہسو
69:- اور جو تینڑیں سجے ہتھ بچ اے او سَٹو تے او نِگل جُلسی جو کج اِنہاں بنڑایا اے بے شک اُنہاں بنڑایا اے جادو نا دھوکا تے جادو گر کدے کامیاب نی ہویا
70:- پس جادو گر سجدے بچ ٹہہ پئے اور اُنہاں آکھیا کہ اسیں ہارون عیہ اور موسیٰ عیہ نے رب تے ایمان کِن آئے
71:- فرعون آکھیا کہ تُسیں اِس نے ایمان کِن آئے او اِس توں پہلے کہ میں تُساں اجازت دیواں بے شک موسیٰ عیہ تُساں نا رب بَڈا اے جِس تُساں جادو سکھایا اے پس میں ضرور کپ چھڑساں تُساں نے ہتھ پیر مخالف سیڈ توں اور میں ضرور تُساں کجھور نے تنے نال سُولی دیساں اور تُسیں ڈاڈا جانڑ کنسو کہ اَساں بچ کونڑ اے عذاب بچ سخت اور تادیر رہنڑیں آلہ
72:- اُنہاں آکھا کہ اسیں تُداں ہرگز ترجیح نہ دینے اُنہاں دلائل تے جیڑے آئے اَساں کول اِس تے جِس اساں پیدا کیتا اے پس توں ہرگز جو توں کرڑیں آلہ ایں اِس توں سوا نی کہ توں صرف دنیا نی زندگی بچ کرسیں
73:- بے شک اسیں اللہ تے ایمان کِن آئے کہ او اساں نی غلطیاں بخش چھڑے اور اِس نے بارے بچ جیڑا توں اَساں جادو نال مجبور کیتا اور اللہ چنگا اے اور ہمیشہ باقی رہنڑیں آلہ اے
74:- بے شک او جیڑا آپڑیں رب نے سامڑیں آیا مجرم بنڑ کے تے بےشک اس وسطے جہنم اے او نہ اِس بچ مرسی تے نہ ای جیسی (زندہ رہے)
75:- اور جیڑا اِس کول مومن بنڑ کے آیا اور اُس چنگے کم کیتے پس اے ای لوک نوں جنہاں نے درجے اُچے نوں
76:- ہمیشہ رہنڑیں آلے باغات اُنہاں تلے نہراں جاری نوں اُنہاں بچ ہمیشہ رہسن او اور اے جزا اے اُس نی جیڑا پاک ہویا

سورت طٰہٰ نا رکوع نمبر 3
پارہ نمبر 16 نا رکوع نمبر 12

77:- اور تحقیق اَساں موسیٰ عیہ آں وحی کیتی کہ راتوں راتی کڈ کھڑ مینڑیں بندیاں اور اُنہاں وسطے دریا نچ عصاء مار کے راہ بنڑا نہ تُداں پکڑ نڑ ہونڑیں نا کوئی خوف ہوسی اور نہ ای غرق ہونڑیں نا
78:- فر فرعون آپڑیں لشکر نال اِنہاں نا پیچھا کیتا تے اُنہاں دریائے نی موجاں پکڑ کِدا جینجو کہ کَج (ڈھانپ) کِدا
79:- اور فرعون آپڑیں قوم آں گمراہ کیتا اور ہدیت نی دتی
80:- اے اولاد یعقوب عیہ تحقیق اَساں تُساں دشمنڑ توں نجات دتی اور کوہِ طور نے سجے پاسیوں تورایت دینڑیں نا وعدہ کیتا اور اَساں لایا تُساں تےمَن اور سلویٰ
81:- جو اَساں تُساں دِتا اِس بیچوں پاک چیزاں کھاؤ اور اِس بچ سرکشی نہ کرو کہ تُساں تے ہوئے مینڑاں غضب اور جِس تے مینڑاں غضب لتھا او تباہ و برباد ہو گیا
82:- اور بے شک میں بَڈا بخشڑیں آلہ واں اِساں جِس توبہ کیتی اور ایمان کِن آیا اور چنگے کم کیتے فر ہدیت تے ریا
83:- اور اے موسیٰ عیہ توں آپڑیں قوم نال کیوں جَلتی کیتی
84:- اُس آکھیا کہ او مینڑیں پچھے آنے او میں تینڑیں دار آنیوں جَلتی کیتی تاکہ تُسیں راضی ہو
85:- اُس آکھیا کہ پس اَساں تحقیق تینڑیں قوم آں آزمائش بچ پایا اور اُنہاں سامری گمراہ کیتا
86:- پس موسیٰ عیہ آپڑیں قوم دار مڑے غصے نال بھرے ہوئے بھرے ہوئے افسوس کرنے آکھیا کہ اے مینڑیں قوم کیا تُساں نال تُساں نے رب چنگا وعدہ نی کیتا کیا لَمی (لمبی) ہو گئی تُساں تے مینڑیں جدائی نی مدت یا تُساں چاہیا کہ تُساں تے تُساں نے رب نا غضب ہووے فر تُساں مینڑیں وعدے نے خلاف کیتا
87:- او بُولے کے اَساں آپڑیں اختیار نال تُساں نے وعدے نے خلاف نی کیتا بلکہ اَساں تے بوجھ پایا گیا فرعون نی قوم نے زیور نا تے اَساں اُساں اگی بچ سَٹ چھڑیا فر اِسی طرح سامری وی سٹیا
88:- فر اِس اِنہاں وسطے اِک بچھا بنڑایا گویا جس آواز گائیں نی اے ای فر اس آکھیا کہ اِے تُساں نا معبود اے اور موسیٰ عیہ نا معبود اے اور موسیٰ عیہ تے پہل (بھول) گئے نوں
89:- بھلا کیا او نی دیکھنے کہ او بچھا اُنہاں نا گل نی کرنا نہ اُنہاں نے نقصان نا تے نہ ای فیدے نا کوئی اختیار سو

سورت طٰہٰ نا رکوع نمبر 4
پارہ نمبر 16 نا رکوع نمبر 13

اپنا تبصرہ بھیجیں