Home » شیخ محمود آفندی – عریش
بلاگز

شیخ محمود آفندی – عریش

اور کچھ لوگوں کو اللہ ایسے چن لیتا ہے کہ وہ لوگ ہر طرف گھٹا ٹوپ اندھیرے میں شمع جلا کر روشنی کرتے ہیں۔ کمال اتاترک ایک انتہائی لبرل قسم کا اور مغربی آقاؤں کا خوش رکھنے والا حکمران تھا، کیا کچھ نہیں کیا اس نے؟ مسجدوں کو تالے لگا دیے، پردے پر پابندی لگائی، دینی کتب پر پابندی، دین کے لیے آواز اٹھانے پر گرفتاریاں اور قتل، گویا کہ اس نے اس بات کا پورا خیال رکھا کہ ترکی کی آئندہ نسل میں دین نظر نہ آئے۔ شاید کافی حد تک وہ کامیاب بھی ہو گیا جس کا ثبوت آج ترکی کا ماحول ہے۔

لیکن ان حالات میں ترکی میں دین، دینی علوم کا محفوظ رہنا، دین پر عمل ہونا جو باقی ہے اس میں ایک بہت بڑا کردار شیخ محمود آفندی کا بھی ہے۔ جن کی ولایت کے معترف ہر مسلک سے تعلق رکھنے والے بڑے بڑے علما ہیں۔ پیر ذوالفقار نقشبندی ہوں یا پیر اجممیر شریف، مفتی تقی عثمانی صاحب ہوں یا عبدالحبیب عطاری صاحب، ہر مسلک کے علما ان کی صحبت سے فیض یاب ہونے کو سعادت سمجھتے تھے۔ترکی میں جب خلافت عثمانیہ کا خاتمہ کیا گیا تو کچھ علماء نے چھپ چھپ کر اور درختوں کے نیچے دیہات اور گاؤں میں وہاں کے بچوں کو دینی تعلیم دینی شروع کی جب وہاں کے لوگ فوج کو آتے دیکھتے تو فورا بچے کھیتی باڑی میں مشغول ہوجاتے یوں محسوس ہوتا تھا کہ یہ بچے کوئی تعلیم حاصل نہیں کر رہے بلکہ کھیتی باڑی میں مشغول ہیں ان طالبعلم بچوں میں شیخ محمود آفندی نقشبندی صاحب بھی شامل تھے، حضرت نے یوں دینی تعلیم کی تکمیل کی اور فراغت کے بعد یہی سلسلہ اپنے گاؤں جاری رکھا ، اسی دوران حضرت آفندی کے دو خلفاء شہید کیے گیے تو حالات کے تناظر میں حضرت آفندی نے وہاں سے شہر کا رخ کیا جہاں ایک قدیم مسجد تھی وہاں رہتے ہوئے حضرت نے چالیس سال تک دین کی تدریس کا کام جاری رکھا۔ تقریبا اٹھارہ سال تک حضرت آفندی کے پیچھے کوئی نماز پڑھنے کیلئے تیار نہیں تھا اٹھارہ سال کے بعد آہستہ آہستہ لوگ آنے لگے اور حضرت آفندی سے فیضیاب ہوتے گئے ۔

آج جب اسی مسجد میں اذان ہوتی ہے تو جوق درجوق لوگ نماز کیلئے اس مسجد میں آنا اپنے لیے باعث سعادت سمجھتے ہیں جو حضرت آفندی جیسے علماء کی محنت اور اخلاص کا نتیجہ ہے -ترکی سے جب خلافت عثمانیہ کا خاتمہ کیا گیا تو وہاں کے بانی کمال اتا ترک نے عربی کتب اور دینی علوم پر مکمل پابندی لگادی ۔اس وقت حضرت مولانا شیخ محمود آفندی نقشبندی نے اپنے طلباء کو انگلیوں کے اشاروں پر صرف اور نحو کے اسباق پڑھائے حج اور نماز کے مسائل بھی ہاتھوں کے اشاروں سے سمجھائے اللہ تعالی نے حضرت آفندی کے ہاتھوں پر مکمل دینی نصاب رکھ دیا تھا. شیخ محمود آفندی کے ساٹھ لاکھ سے زائد شاگرد اور مریدین اس وقت دنیا بھر میں ان کی تعلیمات کو عام کرکے اسلام کا نام روشن کررہے ہیں ،ترکی کے صدر رجب طیب اردوان سمیت حکمران طبقے سے تعلق رکھنے والے بیسیوں وزرا اور اعلی افسران ان کی تعلیمات سے متاثر ہوکر فروغ اسلام کے لئے کوشاں ہیں ،معرفت وطریقت کا یہ تابناک سورج زندگی کی 95بہاریں دیکھنے کے بعد کل غروب ہوگیااللہ تعالیٰ سے دعا ہے کہ ان کو جنت الفردوس میں جگہ عطا فرمائے آمین انا للہ و انا الیہ راجعون (زیر نظر تصویر انکے سفر آخرت کی ہے۔)