کوویڈ مریضہ کے گھر میں ڈکیتی، چوروں کو لینے کے دینے پڑ گئے –




آسٹریلیا میں 4 چوروں کو اس وقت لینے کے دینے پڑگئے جب وہ بے خبری میں ایک کوویڈ مریض کے گھر جا گھسے، پولیس اور ہیلتھ آفیشلز اب چوروں کی تلاش میں سرگرداں ہیں۔

آسٹریلیا کی ریاست وکٹوریہ میں 4 چور ایک ناکام ڈکیتی کے بعد طبی عملے اور پولیس سے چھپتے پھر رہے ہیں، چور بے خبری میں کرونا وائرس پازیٹو مریض کے گھر میں چوری کرنے جا پہنچے تھے۔

وکٹوریہ کا ایک قصبہ چیڈسٹن اس وقت کرونا وائرس کی بدترین صورتحال سے دو چار ہے جہاں ایک ریستوران کے عملے کے 8 افراد سے کرونا وائرس پھیلا، مذکورہ 8 افراد سے وائرس قریبی رہائشی 11 افراد اور پھر قصبے کے 24 افراد میں پھیل گیا۔

ڈکیتی کی مذکورہ واردات بھی اسی ریستوران کے کلینر کے گھر میں ہوئی، پولیس کے مطابق 4 خواتین مبینہ طور پر چوری کرنے کلینر کے گھر میں داخل ہوئیں تاہم عجلت میں واپس لوٹ گئیں۔

پولیس کا کہنا ہے کہ کرونا وائرس سے متاثرہ کلینر چاروں خواتین کو جانتی ہے تاہم وہ پولیس کے سامنے ماننے سے انکاری ہے۔

دوسری جانب ہیلتھ آفیشلز کا کہنا ہے کہ چاروں مبینہ خواتین چور ممکنہ طور پر کرونا وائرس کا شکار ہوچکی ہیں اور اب اسے کمیونٹی کے دیگر افراد میں پھیلا رہی ہیں۔

خیال رہے کہ آسٹریلیا میں اب تک کرونا وائرس کے 27 ہزار 173 کیسز رپورٹ ہوچکے ہیں جبکہ اب تک 895 ہلاکتیں ہوچکی ہیں۔

Comments

اپنا تبصرہ بھیجیں