کویتی حکومت کا ملک بدری سے متعلق بڑا اقدام –




کویت سٹی : کویت کی وزارت داخلہ نے وزارت خارجی امور سے مدد طلب کرتے ہوئے مختلف جیلوں میں قید مجرمان کو ملک بدر کرنے کی درخواست کی ہے۔

کویتی وزارت داخلہ نے مطالبہ کیا ہے کہ وزارت خارجہ امور  مختلف نوعیت کے جرائم میں ملوث قیدیوں کو جلد سے جلد  ملک بدر کرنے کے عمل میں تعاون کرے۔

مقامی ذرائع ابلاغ کے مطابق سیکیورٹی حکام  یومیہ بیس کے قریب ملزمان کو حراست میں لیتے ہیں، ان ملزمان میں منشیات فروش شراب کی فروخت میں ملوث اور منشیات کے عادی افراد شامل ہیں، مذکورہ ملزمان کا تعلق کویتی، جی سی سی، عرب اور  ایشین ممالک کے علاوہ دیگر قومیتوں سے ہوتا ہے۔

وزارت داخلہ کے بیان کے مطابق وزارت پر دباؤ ہے کہ ایسے افراد کو گرفتار کرکے جیلوں میں ڈالا جاتا ہے اور ان قیدیوں کی بڑی تعداد کے باعث جیلوں کے انتظامی امور میں مسائل پیدا ہوتے ہیں اور قیدیوں کی ضروریات کو پورا کرنے میں بھی مشکلات کاسامنا ہے لہٰذا ان مجرمان کی ملک بدری کا عمل تیز کیا جائے۔

وزارت داخلہ نے وزارت خارجہ سے سے مطالبہ کیا ہے کہ ان قیدیوں کے متعلقہ ممالک کے سفارت خانوں سے رابطے کرکے انہیں مسئلہ سے آگاہ کیا جائے تاکہ قیدیوں کو جلد سے جلد جلا وطن کیا جاسکے۔

ذرائع کا مزید کہنا ہے کہ گزشتہ ماہ 40سے زائد منشیات فروشوں اور سیکیورٹی اہلکاروں سے بد کلامی میں ملوث افراد کو گرفتار کیا گیا تھا اور بعد ازاں انہیں محکمہ برائے منشیات کنٹرول کے حوالے کیا گیا۔

 

Comments

اپنا تبصرہ بھیجیں