دنیا بھر میں کرونا وائرس کی دوسری لہر، عوامی اجتماعات پر ایک بار پھر سے پابندیاں عائد




واشنگٹن / نئی دہلی / برازیلیا: کرونا وائرس کی دوسری لہر نے دنیا بھر کو اپنی لپیٹ میں لے لیا، دنیا کے کئی ممالک میں وبا کے پھیلاؤ میں دوبارہ تیزی دیکھی جارہی ہے۔ عالمی سطح پر شادیوں اور عوامی اجتماعات پر ایک بار پھر سے پابندیاں عائد کرنی شروع کردی گئی ہیں۔

تفصیلات کے مطابق کرونا وائرس کی دوسری لہر ایک بار پھر دنیا کے تمام ممالک کومتاثر کر رہی ہے، برطانیہ، ایران، فرانس، اسپین، اٹلی، ارجنٹینا اور چیک ری پبلک شدید متاثر ہورہے ہیں۔

عالمی سطح پر شادیوں اور عوامی اجتماعات پر ایک بار پھر سے پابندیاں عائد کرنی شروع کردی گئی ہیں، ایران، اٹلی، برطانیہ، یورپ اور ملائیشیا میں شادیوں، عوامی و سماجی اجتماعات پر پابندی عائد کردی گئی۔

برطانیہ میں تعلیمی ادارے کھلنے کے بعد کوویڈ 19 کے مریضوں کی تعداد دگنی ہوگئی، نئے مریضوں میں طلبہ کی اکثریت شامل ہے۔

آکسفورڈ کی بروکس یونیورسٹی میں پارٹی میں شریک 100 طلبہ میں کرونا وائرس کی تشخیص ہوگئی۔ شہر میں ریڈ الرٹ کا اعلان کردیا گیا ہے اور اسمارٹ لاک ڈاؤن کے نفاذ کا امکان ہے۔

ایران بھی کرونا وائرس سے دوبارہ متاثر ہونے والے ممالک میں شامل ہے، ایران میں ایک دن میں کرونا وائرس سے 239 افراد جاں بحق ہوگئے۔

عالمی اعداد و شمار

مجموعی طور پر دنیا بھر میں کرونا وائرس سے متاثرہ افراد کی تعداد 3 کروڑ 64 لاکھ 38 ہزار 381 ہوگئی جبکہ کرونا وائرس سے ہلاک افراد کی تعداد 10 لاکھ 61 ہزار 237 ہوگئی۔

دنیا بھر میں کرونا وائرس کے فعال کیسز کی تعداد 79 لاکھ 39 ہزار 695 ہے، ان میں سے 67 ہزار 504 کیسز تشویشناک ہیں جبکہ دنیا بھر میں اب تک 2 کروڑ 74 لاکھ 37 ہزار 448 کرونا مریض صحت یاب ہو چکے ہیں۔

بین الاقوامی اعداد و شمار کے مطابق دنیا بھر میں کرونا وائرس کے کلوزڈ کیسز میں سے 96 فیصد مریض وہ ہیں جو صحتیاب ہوچکے ہیں جبکہ ہلاک ہونے والوں کی شرح 4 فیصد ہے۔

اسی طرح فعال کیسز میں سے 99 فیصد معمولی بیمار ہیں جبکہ صرف 1 فیصد مریضوں کی حالت تشویشناک ہے۔

کرونا وائرس کیسز کے لحاظ سے امریکا دنیا بھر میں پہلے نمبر پر ہے۔

امریکا میں رپورٹ ہونے والے کرونا وائرس کیسز کی مجموعی تعداد 77 لاکھ سے زائد اور فعال کیسز کی تعداد 25 لاکھ 75 ہزار 854 ہو چکی ہے۔

ملک میں ہلاکتوں کی تعداد 2 لاکھ 16 ہزار 788 جبکہ صحت یاب مریضوں کی تعداد 49 لاکھ 84 ہزار 154 ہوچکی ہے، 25 لاکھ سے زائد فعال کیسز میں سے زیر علاج 14 ہزار 571 مریضوں کی حالت تشویشناک ہے۔

بھارت کرونا وائرس کیسز کے حوالے سے دوسرے نمبر پر ہے۔ ملک میں کرونا وائرس سے ایک دن میں 78 ہزار افراد متاثر ہوئے۔

بھارت میں رپورٹ ہونے والے کرونا وائرس کیسز کی مجموعی تعداد 68 لاکھ 35 ہزار سے زائد اور فعال کیسز کی تعداد 9 لاکھ 2 ہزار 397 ہوچکی ہے۔

ملک میں ہلاکتوں کی تعداد 1 لاکھ 5 ہزار 554 جبکہ صحت یاب مریضوں کی تعداد 58 لاکھ 27 ہزار 704 ہوچکی ہے۔

برازیل میں بھی کرونا وائرس کی تباہ کاریاں جاری ہیں۔

برازیل میں رپورٹ ہونے والے کرونا وائرس کیسز کی مجموعی تعداد 50 لاکھ سے زائد اور فعال کیسز کی تعداد 4 لاکھ 62 ہزار 629 ہو چکی ہے۔

ملک میں ہلاکتوں کی تعداد 1 لاکھ 48 ہزار 304 جبکہ صحت یاب مریضوں کی تعداد 43 لاکھ 91 ہزار 424 ہوچکی ہے۔

Comments

اپنا تبصرہ بھیجیں