سعودی وزارت حج و عمرہ کی اہم وضاحت –




ریاض: سعودی وزارت حج و عمرہ کی جانب سے وضاحت جاری کی گئی ہے کہ اعتمرنا ایپ کے ذریعے اجازت ناموں کی کوئی فیس نہیں ہے۔

تفصیلات کے مطابق سعودی وزارت حج و عمرہ نے کہا ہے کہ اعتمرنا ایپ کے ذریعے جاری ہونے والے کسی بھی اجازت نامے پر کوئی فیس نہیں ہے، یہ تمام اجازت نامے مفت ہیں۔

وزارت حج و عمرہ کا کہنا ہے کہ عمرے یا زیارت کے لیے اجازت نامہ حاصل کرنے والوں سے، اگر وہ ٹرانسپورٹ سروس حاصل کرنا چاہتے ہوں، صرف اسی سروس کے لیے فیس وصول کی جاتی ہے۔

سعودی میڈیا کے مطابق اس سے قبل وزارت حج و عمرہ نے اعلان کیا تھا کہ اعتمرنا ایپ کے ذریعے محدود عمرہ پروگرام کا دوسرا مرحلہ آج سے شروع ہوگا، جب کہ اس سلسلے میں اعتمرنا ایپ کے ذریعے چار طرح کے اجازت نامے جاری کیے جا رہے ہیں۔

واضح رہے کہ عمرہ پروگرام کے دوسرے مرحلے کے تحت ہر روز 40 ہزار نمازی اور 15 ہزار عمرہ زائرین مسجد الحرام پہنچیں گے اور یہ حرم مکی کی کل گنجائش کا 75 فی صد ہوں گے۔

نمازیوں اور عمرہ زائرین کو انتظامیہ کی جانب سے ہدایت کی گئی ہے کہ وہ نماز اور عمرے کے حوالے سے اجازت ناموں میں مقررہ اوقات کی پابندی کریں۔

کرونا وائرس سے بچاؤ کی حفاظتی تدابیر کے سلسلے میں بھی ہدایات جاری کی جا چکی ہیں، جن میں کہا گیا ہے زائرین میڈیکل ماسک پہن کر آئیں، اور ہاتھ پابندی سے سینیٹائز کریں۔

Comments

اپنا تبصرہ بھیجیں