ایپ کے ذریعے ٹیکسی منگوا کر ڈرائیور کا لرزہ خیز قتل (ویڈیو بچے نہ دیکھیں) –




میکسیکو: شمالی امریکی ملک میکسیکو میں ایپ کے ذریعے مسافروں نے ٹیکسی منگوا کر اس کے ڈرائیور کو قتل کر دیا۔

غیر ملکی میڈیا کے مطابق میکسیکو شہر میں ایک ٹیکسی ڈرائیور کے لرزہ خیز قتل کا واقعہ سامنے آ گیا ہے، قریب واقع عمارت کی سی سی ٹی وی کیمرے میں یہ واقعہ ریکارڈ بھی ہو گیا۔

52 سالہ ڈرائیور یوآن راموس کو مسافروں نے گھات لگا کر قتل کیا، مقامی اخبار میں شایع شدہ رپورٹ کے مطابق راموس اتوار کو اپنی شفٹ ختم کرنے ہی والا تھا جب انھوں نے دو مسافروں کی جانب سے آئی کال کو قبول کر لیا۔

راموس کے بیٹے کا کہنا تھا کہ اس کے والد نے اسے ٹیکسٹ میسج بھیجا کہ وہ جلد ہی گھر پہنچ رہا ہے، اور اپنی لوکیشن بھی شیئر کی۔

ٹلالپن میونسپلٹی میں واقع ایک عمارت پر کیمرہ لگا ہوا تھا، جس میں راموس کو گاڑی کی رفتار کم کرکے رکتے دیکھا جا سکتا ہے، دو میں سے ایک مسافر دائیں طرف کے پسنجر ڈور کی طرف سے نکلتا ہے اور چند سیکنڈ ٹھہرا رہتا ہے۔

اس کے کچھ ہی دیر بعد گولی چلتی ہے جو ڈرائیور کے لیے مہلک ثابت ہوتی ہے، فائر کے وقت فوٹیج میں روشنی کا ایک جھماکا ہوتے بھی دیکھا جاسکتا ہے۔ اس کے بعد اس شخص نے ڈرائیور کی طرف آ کر راموس کو کھینچ کر باہر نکالا اور وہیں سڑک پر ڈال دیا۔ حملہ آور نے بعد ازاں گاڑی کو لے جا کر قریبی ٹاؤن سان پیڈرو مارٹِر میں چھوڑ دیا۔

ادھر راموس نے جب گھر پہنچنے میں دیر کی تو ان کا بیٹا آخری معلوم لوکیشن کی طرف گیا، جہاں اس کے والد کی لاش پڑی ہوئی تھی۔

میکسیکو سٹی پولیس نے تاحال اس سلسلے میں کوئی گرفتاری عمل میں نہیں لائی ہے۔

Comments

اپنا تبصرہ بھیجیں