کورونا: دنیا بھر میں متاثرین کی تعداد 38 لاکھ 59 ہزار سے تجاوز کر گئی




اسلام آباد: (07 مئی 2020) عالمی وبا قرار دیے جانے والے کورونا وائرس سے پوری دنیا میں متاثرہ افراد کی تعداد 38 لاکھ 59 ہزار سے زائد ہو گئی ہے۔ کورونا وائرس نامی مہلک وبا کے باعث اب تک جہان فانی سے دو لاکھ 66 ہزار سے زائد افراد کوچ کر چکے ہیں۔

پوری دنیا میں اب تک اپنے یقین، مضبوط قوت ارادی اور طاقتور مدافعتی نظام کی بدولت 13 لاکھ 20 ہزار سے زائد افراد کورونا کو شکست بھی دے چکے ہیں۔ امریکامیں کورونا وائرس سے متاثرہ افراد کی تعداد 12 لاکھ 68 ہزار سے بڑھ گئی ہے جب کہ 75 ہزار سے زائد اموات ریکارڈ کی جا چکی ہیں۔ اعداد و شمار کے مطابق اسپین میں کورونا سے متاثرہ افراد کی تعداد دو لاکھ 56 ہزارسے زائد ہو گئی ہے جب کورونا نے مزید 244 افراد کی جانیں لے لی ہیں۔

اس طرح اسپین میں جاں بحق ہونے والوں کی کل تعداد 26 ہزار 8 سو سے بڑھ گئی ہے۔ مطابق اٹلی میں کورونا سے متاثرہ افراد کی تعداد دو لاکھ 15 ہزار سے زائد ہو گئی ہے جب کہ مزید 369 افراد اپنی جانوں کی بازیاں ہار گئے ہیں۔ اٹلی میں جاں بحق ہونے والوں کی کل تعداد 29 ہزار 9 سو سے زائد ہو گئی ہے۔ برطانیہ میں کورونا سے متاثرہ مریضوں کی تعداد دو لاکھ 1 ہزار سے زائد ہو گئی ہے جب کہ ملک میں مزید 649 اموات ریکارڈ کی گئی ہیں۔ اعداد و شمار کے مطابق برطانیہ میں 30 ہزار سے زائد افراد نے داعی اجل کو لبیک کہا ہے۔

فرانس میں ایک لاکھ 74 ہزار سے زائد افراد اب تک کورونا وائرس سے متاثر ہو چکے ہیں۔ اعداد و شمار کے مطابق فرانس میں کورونا سے مزید 278 افراد جاں بحق ہوئے ہیں جس کے بعد کل تعداد 25 ہزار 8 سو سے بڑھ گئی ہے۔ جرمنی میں بھی کورونا کے باعث اموات کا سلسلہ جاری ہے۔ دستیاب اعداد و شمار کے مطابق اب تک سات ہزار 275 سے زائد اموات ہوچکی ہیں۔

کورونا سے متاثرہ افراد کی کل تعداد ایک لاکھ 68 ہزار سے تجاوز کر گئی ہے۔ ترکی میں گزشتہ 24 گھنٹوں کے دوران مزید 64 افراد ہمیشہ کی نیند سو گئے ہیں جس کے بعد ہونے والی اموات کی تعداد تین ہزار 500 سے تجاوز کرگئی ہے۔

دستیاب اعداد و شمار کے مطابق ایران میں کورونا کے سبب مزید 78 افراد نے دار فانی سے کوچ کیا ہے جس کے بعد ملک میں جاں بحق ہونے والوں کی تعداد چھ ہزار 400 سے بڑھ گئی ہے۔ ایران میں اب تک ایک لاکھ ایک ہزار 650 افراد کورونا وائرس سے متاثر ہو چکے ہیں۔

اپنا تبصرہ بھیجیں