سورت الانعام (رکوع نمبر 14 تا 16) – ہندکو ترجمہ




سورت الانعام نا رکوع نمبر 14
پارہ نمبر 8 نا رکوع نمبر 1
111:- اور اگر اَسیں اُنہاں دار فرشتے لاواں آں اور اُنہاں نال مُردے گلاں کرنے اور اَسیں ہر چیز جمع کر چھُڑاں آ او فر وی ایمان نی آنڑنے او پر اے کہ اللہ چاہوے پر اُنہاں بیچوں اکثر چہلے (نادان) نوں
112:- اور اسطرح اَساں ہر نبی وسطے ، انساناں اور جناں نے شیطاناں واں دشمنڑ بنڑایا اے اُنہاں بیچوں کُج اِک دوئے دار خوشامدی (ملمع ) گلاں بہکانڑیں وسطے چھپانے نوں اگر اللہ چاہنا تے اواینجو نی کر اکنے اے او بس اُنہاں چھوڑ دیو جو او کوڑ مارنے گھڑنے نوں
113:- تاکہ اُنہاں لوکاں نے دِل اُس دار مُڑ جُلن او جیڑے لوک قیامتی آں نی مننے اور تاکہ او اُنہاں آلی گل مندے کم کرنے رہوں نوں
114:- کیا میں اللہ توں بغیر کوئی ہور منصف لوڑاں اور او ای اللہ جِس کتاب لائی اے اورجنہاں اللہ کتاب دِتی اے اہل کتاب اُنہاں پتا اے کہ اے اللہ نی طرفوں سچی لائی گئی اے سو تُسیں شک کرڑیں آلیاں بیچوں نہ ہو جُلیو
115:- اور پوری اے تُساں نے اللہ نی گل سچ تے انصاف نی اِس نی گل کوئی بدل نی اکنا او او ای سنڑنے تے جانڑنے آلہ اے
116:- اُنہاں بیچوں کج اے جئے نوں اگر اُنہاں نی گل منسو تے او تُساں اللہ کولوں دور کر چھڑسن او اور او نی پیروی کرنے مگر گمان نی اور او صرف اٹکلیاں نسانے نوں
117:- تینڑاں رب اُساں ڈاڈا سیانڑنا اے جیڑا فر جُلنا اے اُس نے راہے بیچوں اور او ہدیت یافتہ لوکاں وی خوب سیانڑنا اے
118:- سو تُسیں اُس بیچوں کھاؤ جِس اُتے اللہ نا نام کِدا گیا ہووے اگر تُسیں اُس نیاں آیتاں مننے او
119:- اور تُساں کے ہویا اے کہ تُسیں اُس بیچوں نہ کھاؤ جِس اُتے اللہ نا نام کِدا گیا اے حالانکہ او تُساں تے واضح کر چکیا اے کہ حرام کے وے مگر جِس اُتے تُسیں لاچار او اور بہوں سارے لوک آپڑیں خواہشات توں تحقیق نے بغیر گمراہ کرنے نوں بے شک تُساں نا اللہ حد توں بدڑیں آلیاں ڈاڈا سیانڑنا اے
120:- اور چھوڑ دیو کھلا غناہ اور چھپیا ہویا جَلتی ای اُس نی سزا مِل جُلسی جیڑے اے مندے کم کرنے نوں
121:- اور اُس بیچوں نہ کھاؤ جس اُتے اللہ نا ناں نی کنڑ ہویا اے غناہ نے اور بے شک شیطان آپڑیاں سنگیاں نے دِلاں بچ وسوسے پانا اے تاکہ او کُلن (جھگڑا) او اور اگر تُساں اُنہاں نا آکھڑاں منیا تے بے شک تُسیں وی مشرک ہو گئے او
سورت الانعام نا رکوع نمبر 14 مکمل
سورت الانعام نا رکوع نمبر 15
پارہ نمبر 8 نا رکور نمبر 2
122:- کیا او بندا جیڑا مُردہ ایا فر اَساں اُساں جینا کیتا اور اَساں اُس وسطے نور بنڑایا اور او ٹرنا پھرنا اے اُس نور نی لُوئی نال لوکاں بچ کیا اِس جیا ہو جُلسی او جیڑا نیرے بچ اے اِس بیچوں نکلڑیں آلہ نہیں اِسے طرح ای کافراں وسطے اُنہاں نے عمل زینت دتے گئے نوں
123:- اور اِسطرح ای اَساں ہر گرائیں (بستی) بچ بڈے مجرم بنڑائے نوں تاکہ او اِس بچ حیلہ کرن اور اوحیلہ نی کرنے پر آپڑیں جاناں اُتے چالاں چلنے نوں اور او شعور نی رکھنے او
124:- اور جدوں اُنہاں کول کوئی آیت آنی اے تے او آکھنے نوں اَسیں ہرگزنہ مننے جدوں تک اَساں اے جیا نہ دِتا جُلے جیڑا اللہ نیاں رسولاں دِتا گیا اے اللہ واں ڈاڈا پتا اے کہ آپڑیں گل کیتھے پیجے جَلتی اُنہاں لوکاں پہنچسی جنہاں جرم کیتا اللہ کول ذلت تے ڈاڈا عذاب اے اِس نا بدلہ جو او مَکر کرنے او
125:- بس اللہ جِساں ہدیت دینڑاں چاہنا اے اُس نا سینہ اسلام وسطے کھول چھڑ نا اے اور جِساں چاہوے کہ گمراہ کرے تے اُس نا دِل تنگ کر چھڑنا اے گویا کہ او زور لا کہ آسمان تے چڑنا اے پیا اِسطرح ای اللہ اِنہاں لوکاں تے عذاب آنڑسی جیڑے ایمان نی آنڑنے
126:- اے راہ اے تُساں نے اللہ نی سدھی اَساں آیتاں کھول کہ دس چھڑیاں نوں اُنہاں لوکاں وسطے جیڑے نصیحت پکڑنے نوں
127:- اُنہاں وسطے اُنہاں نے اللہ کول سلامتی ناگھر اے اور او اُنہاں نا کارساز اے اِس نے بدلے بچ جو او کرنے نوں
128:- اور جِس دیاڑے او جمع کرسی اُنہاں ساریاں تے او آکھی اے گروہ جنات تُساں آدمی آپڑیں تابع کر کِدے او اور انساناں بیچوں اُنہاں نے سنگی آکھسن او اے اللہ اَساں نیا کج اک دوئے توں مندا چاہیا اے اور اَسیں اُس معیار آں پہنچ گئے آں جو تُساں مقرر کیتی اللہ آکھسی اگی بچ رہو تُساں نا پکا ٹھکانڑاں اے ای اے مگر جِساں اللہ چاہوے بے شک اللہ ای حکمت آلہ جانڑنے آلہ اے
129:- اور اِس طرح بعض ظالماں دوئیاں اُتے اُنہاں نے اعمال نی وجہ توں مسلط کر چھڑنے آں
سورت الانعام نا رکوع نمبر 15 مکمل
سورت الانعام نا رکوع نمبر 16
پارہ نمبر 8 نا رکوع نمبر 3
130:- اے جناں تے انساناں نے گروہ کیا تُساں کول تُساں بیچوں اَساں نے رسول نی آئے او تُساں اُتے اَساں نے حکم بیان کرنے نوں اور تُساں ڈرانے اے دیاڑہ دیکھڑیں توں او آکھسن اسیں آپڑیاں جاناں نے خلاف گواہی دینے آں اور اُنہاں نی زندگی دھوکے بچ پا چھڑیا ایا اور اُنہاں آپڑیں خلاف گواہی دِتی کہ او کفر کرڑیں آلے نوں
131:- اے اِس کرکے کہ اللہ ظلم نی سزا بچ گراواں ہلاک کرڑیں آلہ نی جبکہ اُنہاں نے لوک بے خبر نوں
132:- ہر اکی وسطے اُس نے اعمال نے درجے نوں اور اللہ اِس توں بے خبر نی جو او کرنے نوں
133:- اور تُساں نا اللہ بے نیاز اے اللہ رحمت آلہ اگر چاہوے تے تُساں ہلاک کر کے جِساں چاہوے جانشین کر چھڑے جِس طرح اُس تُساں دوئی قوم نی اولادی توں پیدا کیتا اے
134:- بےشک جِس نا تُساں نال وعدہ کیتاگیا اے او ضرور آنڑے آلی اے اور تُسیں عاجز کرڑیں آلے نی او
135:- آپ صہ آکھو کہ اے مینڑیں قوم تُسیں آپڑیں جائی (جگہ) کم کرو میں وی کم کرنا واں بس تُسیں جَلتی سمجھ جُلسو کہ کِس وسطے اے آخرت نا کہار (گھر) بے شک ظالم دو جہاناں نی کامیابی نی پانے او
136:- اور اللہ جو ڈوگیاں (کھیتی) تے ڈنگر جمائے (پیدا کیے) نوں اِس توں اُنہان اِک حصہ اللہ وسطے کیتا اے اُنہاں آپڑیں خیال بچ آکھیا کہ اے اللہ وسطے اے اور اے اَساں نیاں شریکاں وسطے بس جیڑا اُنہاں نیاں شریکاں وسطے اے او می پہنچنا اللہ واں اور جیڑا اللہ وسطے اے او اُنہاں نیاں شریکاں پہنچ جُلنا اے مندا اے جو او فیصلہ کرنے نوں
137:-اور اِسطرح ای بہوں سارے مشرکاں اُنہاں نیاں شریکاں نا قتل آسان (آراستہ) کر دتا اے تاکہ اُنہاں مار چھرن اور دین گڈ مڈ (مکس) کر چھڑن او اگر اللہ چاہنا تے او اینجو نی کر اکنے اے تُسیں اُنہاں چھوڑ دیو جو او کرنے نوں
138:- اُنہاں آکھیا کہ اے ڈوگیاں (کھیتی) تے ڈنگر منع نوں اِساں کوئی نہ کھاوے مگر جِساں اسیں چاہواں اُنہاں نے کوڑے خیال نے مطابق اور کج ڈنگر اے نوں جنہاں نی کنڈی تے سواری حرام اے اور کج ڈنگر جنہاں او ذبغ کرنیوں اللہ نا ناں نی کننے اور اے کوڑ مارنے نوں اللہ اُتے اور جَلتی اُنہان سزا مِلسی جو او کوڑ مارنے نوں
139:- اُنہاں آکھیا کہ جو اُنہاں ڈنگراں نے پیٹے بچ اے او اَساں نیاں مرداں وسطے اے اور عورتاں تے حرام اے اور اگر مُردہ ہووے تے فر سارے شریک نوں او جَلتی اُنہاں اُنہاں نی گلاں بنڑاڑیں نی سزا دیسی او حکمت آلہ جانڑنے آلہ اے
140:- البتہ او لوک کہاٹے بچ نوں جنہاں بے وقوفی یا نادانی نال آپڑیں اولاد قتل کیتی اور جیڑا اللہ دِتا اے او حرام کر کِدا کوڑ مارنیوں اللہ اُتے یقینناً اوگمراہ ہوئے اور ہدیت پانڑیں آلے نی نوں
سورت الانعام نا رکوع نمبر 16 مکمل

اپنا تبصرہ بھیجیں