سورت الیونس (رکوع نمبر 4 تا 6) – ہندکو ترجمہ




سورت یونس نا رکوع نمبر 4
پارہ نمبر 11 نا رکوع نمبر 9
31:- آپ صہ پچھو کہ کونڑ تُساں آسمان تے زمی بیچوں رزق دینا اے یا کونڑ کَن تے اکھیاں نا مالک اے اور کونڑ زنداں واں مردے توں کڈنا اے اور کڈنا اے مردے توں جینے آں اور کونڑ کماں نی تدبیر کرنا اے او بول چھڑسن او کہ “اللہ” آپ صہ آکھو کہ کیا تُسیں فر وی نی ڈرنے او
32:- پس اے اے اللہ ! سچا رب فر تُسیں کدھر پھرنے او سچ توں بعد گمراہی بچ کے رہ گیا اے
33:- اِسطرح اللہ نی گل اُنہاں لوکاں تے سچی ہوئی کہ جنہاں نافرمانی کیتی اور او ایمان نی آنڑنے
34:- آپ صہ پچھو کہ کیا تُساں نیاں شریکاں بیچوں کوئی اے جیڑا پہلی دفعہ مخلوق پیدا کرے فر اُساں لوٹاوے آپ صہ آکھو کہ اللہ پہلی دفعہ پیدا کرنا اے فر موڑنا اے تہ تُسیں کدھر پھرنے او
35:- آپ صہ پچھو کہ کیا تُساں نیان شریکاں بیچوں کوئی اے وے جیڑا صیح راہ دسے آپ صہ آکھو کہ اللہ صیح راہ دسنا اے کیا جیڑا صیح راہ دسنا اے او زیادے حقدار اے پیروی نا یا او جِساں آپے آں راہ نی صیح بلکہ راہ دسی جُلنی اے تُساں کے ہو گیا اے تُسیں کے او جیا فیصلہ کرنے او
36:- اُنہاں بیچوں اکثرپیروی نی کرنے پر گمان نی بے شک گمان حق نی معرفت نا کج وی کم نی دینا بے شک اللہ واں ڈاڈا پتا اے جو او کرنے نوں
37:- اور اے قرآن اینجو نی کہ کوئی اللہ نی مرضی نال بنڑا کنے آپڑیں کولوں پر اُس نی تصدیق کرنڑیں آلہ اے جو اِس توں پہلے لتھا اے اور کتاب نی تفصیل اے اِس بچ کوئی شک نی کہ اے سارے جہان نے اللہ نی طرفوں اے
38:- کیا او آکھنے نوں کہ او اِساں بنڑا کہ کن آیا اے آپ صہ آکھو کہ تُسیں اِس جئی اک سورت بنڑا آنڑو اور جساں مرضی نے بلاکنو اللہ توں سوا اگر تُسیں سچے او
39:- بلکہ اُنہاں اِساں نی منیا جس نے علم تے اُنہاں قابو نی پا کدا اور اِس نی حقیقت اُنہاں کول ہالے نی آئی اِسطرح کی اِنہاں توں پہلے والیاں نی منیا تے آپ صہ دیکھو کہ ظالماں نا حال کے ہویا
40:- اُنہاں بیچوں کج ایمان کِن آنڑسن او تے کج نی آنڑنے اور تُساں نا اللہ فرسادی آں سیانڑنا اے ڈاڈی طرح نال
سورت یونس نا رکوع نمبر 4 مکمل
سورت یونس نا رکوع نمبر 5
پارہ نمبر 11 نا رکوع نمبر 10
41:- اگر او تُساں نہ منن او تے آپ صہ آکھو کہ تُساں وسطے تُساں نے عمل تے مینڑیں وسطے مینڑیں عمل تُسیں اِس نے جوابدہ نی او جو میں کرنا تے میں اُسنا جوابدہ نہ جو تُسیں کرنے او
42:- اور اِنہاں بیچوں کج کَن لانے نوں آپ صہ دار تے کیا تُسیں ڈوریاں (بہرے) سنڑاسو خواہ او عقل نہ رخنے ہون او
43:- اور اُنہاں بیچوں کج دیکھنے نوں تُساں دار تے کیا تُسیں انیاں (اندھے) دسو جیڑے نی دیکھ اکنے
44:- بے شک اللہ ظلم نی کرنا لوکاں تے لیکن لوک آپڑیں اُتے ظلم کرنے نوں
45:- اور جِس دیاڑے او محشر بچ اِنہاں جمع کرسی گویا او دنیا بچ نی رہے پر دیاڑی نا اک ٹیم آپس بچ پہنچاسن البتہ او کہاٹے بچ نوں جنہاں نی منیا اللہ نال ملڑیں آں اور او ہدیت پاڑیں آلے نی نوں
46:- اور اگر تُساں کج وعدے دَس چھڑاں جو اَسیں اُنہاں نال کرنے آں یا اسیں تُساں دنیا توں چا کناں پس اُنہاں اَساں دار مڑنا اے فر اللہ اِس اُتے گواہ اے جو او کرنے نوں
47:- اور ہر اکی مت وسطے اک رسول اے پر جدوں اُنہاں نا رسول آگیا اُنہاں نے درمیان انصاف نال فیصلہ کر چھڑیا اور اُنہاں تے ظلم نی ہونا
48:- اور او آکھنے نوں اے وعدہ کدوں پورا ہوسی اگر تُسیں سچے او
49:- آپ صہ آکھو کہ میں آپڑیں جانی نے نفع نقصان نا مالک نہ او پر جو اللہ چاہے ہر امت وسطے اک مقررہ ٹیم اے جدوں اُنہاں نا ٹیم آ جُلسی نہ او اک پل دیر کرسی نہ جَلتی
50:- آپ صہ آکھو کہ بھلا تُسیں دیکھو کہ اگر تُساں اُتے عذاب آوے راتی یا دیاڑی نے ٹیم تے او کہ اے جس نی مجرم جَلتی کرنے نوں
51:- کیا فر جدوں آ وینجسی تے فر تُسیں اِس اُتے ایمان آنڑسو ہنڑ مننے او البتہ تُساں جَلتی چاہنے او
52:- فر ظالماں آکھیا جُلسی تُسیں ہمیشہ نا عذاب چکھو تُساں او ای بدلہ دتا جُلنا اے جو تُسیں کمانے او
53:- آپ صہ کولوں پچھنے نوں کہ کیا اے سچ اے آپ صہ آکھو ہاں مینڑیں اللہ نی قسم اے ضرور سچ اے اور تُسیں عاجز کرنڑیں آلے نی او
سورت یونس نا رکوع نمبر 5 مکمل
سورت یونس نا رکوع نمبر 6
پارہ نمبر 11 نا رکوع نمبر 11
54:- اور اگر ہر ظالم وسطے او ہووے جو کج زمی بچ اے اور او اِس نا فدیہ چا دیوے اور او چھپ چھپ کہ پشیمان ہوسن او جدوں عذاب دیکھسن او اور اُنہاں نے درمیان انصاف نال فیصلہ ہوسی اُنہاں اُتے ظلم نی ہونا
55:- یاد رکھو اللہ وسطے اے جو کج زمی بچ تے آسمان بچ اے اور اللہ نا وعدہ سچا اے لیکن اُنہاں بیچوں اکثر نی جانڑنے
56:- او ای زندگی دینا اے تے او ای مارنا اے اِس دار ای تُسیں مڑسو
57:- اے لوکو تحقیق تُساں کول آگئی اے نصیحت تُساں نے اللہ نی طرفوں اور شفاء اُس روگ نی جیڑا دِلاں بچ اے اور مومناں وسطے ہدیت تے رحمت
58:- آپ صہ آکھو کہ اللہ نی رحمت تے فضل نال اور او اِس اُتے خوشی مناؤن اِے سب چنگا اے جو او جمع کرنے نوں
59:- آپ صہ آکھو کہ بھلا جو اللہ تُساں وسطے رزق لایا اے فر تُساں اِس بیچوں کج حرام بنڑا کدا اے اور کج حلال آپ صہ آکھو کہ کیا تُساں اللہ حکم دتا اے یا اللہ اُتے کوڑ مارنے او
60:- اور اُنہاں لوکاں نا خیال اے جیڑے اللہ اُتے کوڑ مارنے نوں اُنہاں نا کے حال ہوسی بے شک اللہ لوکاں تے فضل کرنا اے لیکن اِنہاں بیچوں اکثر شکر نی کرنے کرنے او
سورت یونس نا رکوع نمبر 6 مکمل

اپنا تبصرہ بھیجیں