سورت یوسف (رکوع نمبر 1 تا 4) – ہندکو ترجمہ




سورت یوسف نا رکوع نمبر 1
پارہ نمبر 12 نا رکوع نمبر 11
1:- ا ل ر اے روشن کتاب نیاں آیتاں نوں
2:- بے شک اَساں قرآن عربی بچ لایا تاکہ تُسیں سمجھو
3:- اَسیں تُساں اُتے بہوں چنگا قصہ بیان کرنے آں اِس وسطے کہ اَساں تُساں دار قرآن پیجیا اور تحقیق تُسیں اِس توں پہلیوں بے خبراں بیچوں اے او
4:- جدوں یوسف عیہ آپڑیں ابو آں آکھیا کہ اے مینڑیں ابو! بے شک میں 11 ستارے تے سورج چَن آں خاباں بچ دیکھیا اے اور میں اُنہاں آپڑیں وسطے سجدہ کرنا دیکھیا اے
5:- اُنہاں آکھیا کہ اے مینڑیں پُتر آپڑاں خواب آپڑیاں پراواں نال نہ کریں اور تینڑیں وسطے کوئی چال چلسن او بے شک شیطان انسان نا کھلا دشمنڑ اے
6:- اور تینڑاں اللہ اِسے طرح تُداں چنڑکنسی اور تُساں خواباں نی تعبیر کڈریں دسسی اور تُساں تے آپڑیں رحمت پوری کر چھڑسی اور یعقوب عیہ نے گھر آلیاں تے جینجو اللہ اِس تو پہلے تینڑیں پیو دادے ابراہیم عیہ اور اسحاق عیہ تے پورا کیتا بے تینڑاں اللہ علم آلہ تے حکمت آلہ اے
سورت یوسف نا رکوع نمبر 1 مکمل
سورت یوسف نا رکوع نمبر 2
پارہ نمبر 12 نا رکوع نمبر 12
7:- بےشک یوسف عیہ اور اُس نیا پراواں بچ پچھڑیں آلیاں وسطے کھلیاں نشانیاں نوں
8:- جدوں اُنہاں آکھیا کہ ضرور یوسف عیہ اور اُنہاں نا پرا اَساں نے ابو آں اَساں توں زیادے چنگے لگنے نوں جبکہ اَسیں زیادے باٹے آں بے شک ابا بڈی (صریح) غلطی کرنے نوں
9:- یوسف عیہ آں مار چھڑو یا اُنہاں کِسے زمی بچ سَٹ آؤ تُساں نے پیو وسطے خالص ہو جُلے اورتُسیں ہو جُلو اُس توں بعد نیک لوک
10:- اُنہاں بیچوں اِکی آکھیا کہ یوسف عیہ آں قتل نہ کرو اگر تُساں کرنا ای اے تے اِنہاں کُھوئے (کنویں) بچ سَٹ چھڑو تاکہ کوئی مسافر چا کھڑے نے اگر تُساں کرنا ای اے
11:- آکھنے اے کہ اِے اَبا ! توں یوسف عیہ نے بارے بچ اَساں نا یقین کیوں نی کرنا ایں تُداں کے ہویا اے بے شک اَسیں اُس نے خیرخواہ اے آں
12:- کل اُساں اَساں نال پیج چھڑو او جنگل نے پھر کھاؤن اور کھیڈن کُدن او بے شک اَسیں اُسنے محافظ آں
13:- اُنہاں آکھیا کہ مَاں (مجھے) اے غم لگیا اے کہ تُسیں اِساں کِن جُلو اور میں ڈرنا کہ اِساں بھیڑیا کھا جُلے اور تُسیں اِس توں بے خبر رہو
14:- او آکھنے کی اگر اِساں بھیڑیاں کھا جُلے جبکہ اَسیں اک باٹی جماعت آں اِس صورت بچ بے شک اَسیں زیاں کار ٹھہرساں
15:- فر جدوں اُو اُساں کِن گئے اور اُنہاں اتفاق کیتا کہ اِساں اَنے کھوئے بچ سٹساں اور اَساں اُنہاں دار وحی پیجی کہ توں اِنہاں نے اِس کمے آں ضرور جتلاسیں اور او تُداں نی سیانڑنے ہونے
16:- اور نیرا پیا تے او آپڑیں پیو کول رونے ہوئے آئے
17:- بولے اے ابا جان اَسیں دوڑ لا کہ اگے نکلنے آں لگے آں اور یوسف عیہ آں سامان کول چھوڑیا تے اُساں بھیڑیا کھا گیا اور توں یقین نی کرنڑاں خواہ اَسیں سچے ہواں
18:- اور او قمیضاں تے کوڑا خون لا کے کِن آئے اُس آکھیا کہ تُساں نے دِلے تُساں وسطے اک گل بنڑا کِدی پس صبر ای چنگا اے اور جو تُسیں دَسنے او میں اللہ کولوں مدد چاہنا واں
19:- اور اِدھر اِک قافلہ آیا پس اُنہاں آپڑاں پاڑیں بھرنے آلہ پیجیا اُس آپڑاں ڈھول سٹیا اُس آکھیا آہا خوشی نی گل اے اے اک جنک (لڑکا) نے اُنہاں اُساں مال تجارت سمجھ کہ چھپا کِدا اور اللہ ڈادا پتا اے جو او کرنے اے
20:- اور پراواں اُنہاں بیچ چھڑیا کھوٹے دام گنتی جے کج درہماں بچ اور او اِس توں بیزار ہونے اِے
سورت یوسف نا رکوع نمبر 2 مکمل
سورت یوسف نا رکوع نمبر 3
پارہ نمبر 12 نا رکوع نمبر 13
21:- اور مصر نے جیڑے بندے اُساں خریدیا اُس آپڑیں بڈی (عورت) آں آکھیا کہ اِساں عزت تے تکریم نال رکھ شید کہ اَساں فیدا پہنچائے یا اَسیں اِساں پتر بنڑا کِناں اور اس طرح اَساں یوسف عیہ آں ملک مصر بچ جگہ دِتی تاکہ اَسیں اُنہاں گلاں نا انجام (خواباں نی تعبیر) کڈڑاں دَساں اور اللہ آپڑیں کم تے غالب اے اکثر لوک نی جانڑنے
22:- اور جدوں یوسف عیہ آپڑیں جوانی آں پہنچ گیا اور اَساں اُنہاں حکم تے علم عطا کیتا اوراِسطرح ای اَسیں نیکی کرڑیں آلیاں اجر دینے آں
23:- یوسف عیہ آں عورت پھسلایا جِس گھر بچ او اے آپڑیں آپ آں قابو رکھڑیں توں اور بوئے (دروازے ) بند کر چھڑے اور بولی جلتی آ اُنہاں آکھیا کہ اللہ نی پناہ او عزیر مصر مینڑاں مالک اے اُس مینڑاں رہن سہن بہوں چنگا رکھیا اے بےشک کہ ظالم بھلائی نی پانے
24:- اور بے شک اِس عورت اُنہاں نا ارادہ کیتا اور او وی اِس نا اردادہ کرنے اگر اے نہ ہونا کہ او آپڑیں اللہ نی دلیل دیکھ کنسن آ اِسطرح اَساں اُنہاں توں برائی او بے حیائی پھیر چھڑی بے شک او اَساں نے برگزیدہ بندیاں بیچوں اِیا واں
25:- اور دوئے دروازے دار نسے اور عورت اُنہاں نی قمیض پھار چھڑی پیچھوں اور دوآں اُس نا شوہر دروازے کول مِلیا اور آکھڑیں آں لگ پئی کہ اِس نی کہ سزا اے جِس تیری بیوی نال مندا ارادہ کیتا اے سوائے اِس توں کہ قید کیتا جُلے یا دردناک عذاب دِتا جُلے
26:- اور یوسف عیہ آکھیا کہ اِس مَاں (مجھے) مینڑیں نفس نی حفاظت توں پھسلایا اے اور گواہی دتی اِس نیا لوکاں بیچوں اِکی کہ اگر قمیض اگوں پھٹی اے تے یوسف عیہ کوڑا اے اور او سچی اے
27:- اور اگر قمیض پچھوں پھٹی اے تے یوسف عیہ سچا اے اور اے کوڑیاں بیچوں اے اور یوسف سچا اے
28:- تے جدوں قمیض پچھوں پھٹی دیکھی تے اُس آکھیا کہ اِے تُساں عورتاں نا فریب اے بےشک تُساں نا فریب بَڈا اے
29:- یوسف عیہ اِس گلاں چھوڑو اور اے عورت آپڑیں غناہ نی بخشش منگ بےشک توں ای خطاکاراں بیچوں ایں
سورت یوسف نا رکوع نمبر 3 مکمل
سورت یوسف نارکوع نمبر 4
پارہ نمبر 12 نا رکوع نمبر 14
30:- اور شہر بچ عورتاں آکھیا کہ عزیز نی بیوی پھسلایا اے آپڑیں غلام آں نفس نی حفاظت توں اُس نی محبت اُس نے دِلے بچ جگہ پکڑ گئی اے اور بےشک اَسیں اُساں کھلی گمراہی بچ دیکھنیاں
31:- فر جدوں اُس اُنہاں نے فریب نا زکر سنڑیا تے اُنہاں دعوت بھیجی سو اور اُنہاں وسطے محفل تیار کیتی سو اور پھل کٹڑیں وسطے ساریاں اک اک چھری دتی سو اور فر آکھیا سو یوسف عیہ آں کہ اُنہاں نے سامڑیں نکل آؤ فر جدوں اُنہاں دیکھیا تے اُنہاں تے حسن یوسف عیہ چھا گیا اور اُنہاں پھلاں نی جائی آپڑیں ہتھ کٹ کِدے اور آکھڑیں آں لگ پئیاں کہ اے بشر نی او اللہ نی پناہ اے تے بزرگ فرشتہ اے
32:- او بولی کہ سو اے او ای اے جِس نے بارے بچ تُساں مَاں (مجھے) ملامت کیتی اور میں اِساں نفس نی حفاظت توں پھسلایا تے اُس آپڑیں آپ آں بچا کِدا اور جو میں آکھنی آں اگر اُس نہ کیتا تےاو قید ہو جلسی او اور او لوکاں بچ بے عزت ہوسی
33:- یوسف عیہ آکھیا کہ اے مینڑیں اللہ مَاں (مجھے) قید زیادہ چنگی اے اِس کولوں جدھر او بھلانی اے اگر توں اُنہاں نا فریب مینڑیں داروں نہ پھیریا تے میں مائل ہو جُلساں اُنہاں دار اور میں جاہلاں بیچوں ہو جُلساں
34:- سو اللہ اُنہاں نی دعا قبول کر کِدی اور اُس توں اُنہاں نا فریب پھیر چھڑیا بےشک اللہ سنڑنے اور جانڑنے آلہ اے
35:- فر نشانیاں دیکھڑیں توں بعد اُنہاں لگیا کہ اِنہاں اک مدت تک ضرور قید بچ پا چھڑو
سورت یوسف نارکوع نمبر 4 مکمل

اپنا تبصرہ بھیجیں