سورت النحل (رکوع نمبر 7 تا 9) – ہندکو ترجمہ




سورت النحل نا رکوع نمبر 7
پارہ نمبر 14 نا رکوع نمبر 13

51:- اور اللہ آکھیا کہ نہ بنڑاؤ تُسیں دو معبود اِس توں سوا کہ معبود اِک ای اے پس تُسیں مینڑیں کولوں ای ڈرو
52:- اُسی وسطے اے جو کج آسمان تے زمی بچ اِے اور اُسے وسطے اے اطاعت وعبادت لازم اے سو کیا تُسیں اللہ توں سوا کِسے ہور کولوں ڈرنے او
53:- اور تُساں کول جیڑی نعمت اے اللہ نی طرفوں اے فر جدوں تُساں تکلیف ملنی اے تے تُسیں رونے ہوئے آنے او
54:- فر جدوں او تُساں توں سختی دور کر چھڑنا اے تے تُساں بیچوں اِک فریق اُس ٹیم آپڑیں اللہ نا شریک کرڑیں آں لگ جُلنا اے
55:- تاکہ او اِس نی ناشکری کرے جو اَساں اُنہاں دِتا اے تے تُسیں فیدا چا کنو پس عنقریب تُساں پتا چل جُلسی
56:- جو اَساں اُنہاں دِتا اُس بچ حصہ مقرر کرنے نوں جنہاں معبوداں او نی سیانڑنے اللہ نی قسم تُساں کولوں اِس بارے بچ ضرور پچھیا جُلسی جیڑا تُسیں کوڑ مارنے او
57:- اور اللہ وسطے تِیاں (بیٹیاں) بنڑانے نوں اور آپڑیں وسطے جو اُنہاں نا دل کرنا اے
58:- اور جدوں اُنہاں بیچوں کِسے آں تِیو (بیٹی) نی خوشخبری دتی جُلنی اے تے اُنہاں نے منہ آں نا رنگ کالا ہو جُلنا اے اور غصے نال پھرے جُلنے نوں
59:- لوکاں توں پچھنے نوں اس برائی نی خوشخبری نے بدلے جو اُنہاں دتی گئی اے ہنڑ سوچنے نوں کہ آیا اِساں رسوائی نال رکھاں یا اِساں مٹی بچ دَب چھڑاں یاد رکھو مندا اے جیڑا او فیصلہ کرنے نوں
60:- جیڑے لوک قیامتی تے ایمان نی رکھنے او اُنہاں نا حال مندا اے اور اللہ نی شان اُچی اور اللہ غالب حکمت آلہ اے
سورت النحل نا رکوع نمبر 7 مکمل

سورت النحل نا رکوع نمبر 8
پارہ نمبر 14 نا رکوع نمبر 14

61:- اور اگر اللہ پکڑے لوکاں اُنہاں نے ظلم نے بدلے تے او زمی تے کوئی ٹُرنے آلہ نہ چھوڑے لیکن اللہ اِنہاں ٹہل دینا اے اک مقررہ ٹیم تک فر جدوں او ٹیم آگیا تے نہ او اک گھڑی پچھے ہٹسن او نہ ای اگے بدسن او
62:- اور او اللہ وسطے ٹھہرانے نوں جو آپڑیں وسطے نا پسند کرنے نوں اور اُنہاں نیاں زباناں کوڑ مارنیاں نوں کہ اُنہاں وسطے بھلائی اے لازمی گل اے اُنہاں وسطے جہنم اے اور اوجہنم بچ اگے پیجے جُلسن او
63:- اللہ نی قسم اَساں پیجے تساں توں پہلیاں اُمتاں وسطے رسول فر شیطان اُنہاں نے کم اُنہاں چنگے کرکے دسے پس اج او اِنہاں نا رفیق اے اور اُنہاں وسطے ڈاڈا عذاب اے
64:- اور اَساں تُساں تے کتاب نی لائی مگر صرف اِس کر کے کہ تُسیں واضح کر چھڑو جِس بچ اُنہاں اختلاف کیتا اور ہدیت و رحمت اُنہاں وسطے جیڑے ایمان کن آئے
65:- اور اللہ آسمان توں پاڑیں لایااور زمی آں بنجر ہوڑیں توں بعد جینا کیتا بے شک اِس بچ اُنہاں وسطے نشانیاں نوں جیڑے سنڑنے نوں
سورت النحل نا رکوع نمبر 8 مکمل

سورت النحل نا رکوع نمبر 9
پارہ نمبر 14 نا رکوع نمبر 15

66:- اور بے شک چوپائیاں بچ مقام عبرت اے اَسیں تُساں خالص دودھ پلانے آں اِس توں جیڑا گوئے (گوبر) اور خون نے درمیان اُنہاں نے پیٹے بچ اے پینڑیں آلیاں وسطے خوشگوار اے
67:- اور کجھور تے انگور نا رس تُسیں اِس نال شراب بنڑانے او اور چنگا رزق حاصل کرنے او بے شک اِس بچ عقل آلیاں وسطے نشانیاں نوں
68:- اور تُساں نے رب شہد نی مکھی آں الہام کیتا کہ توں گھر بنڑا پہاڑاں ، بوٹیاں (درخت) اور اُس جائی جتھے اور چھتریاں بناؤن
69:- فر کھا ہر قسم نے پھلاں توں اور فر اللہ نے ہموار کیتی راہ تے چل اِنہاں نیاں پیٹاں توں شہد نکلنا اے اِس نے رنگ الگ نوں اِس بچ لوکاں وسطے شفاء اے بے شک اِس بچ اُنہاں وسطے نشانی اے جیڑے سوچنے نوں
70:- اور اللہ تُساں پیدا کیتا فر او ای موت دینا اے اور کج آں ناکارہ عمراں تک پہنچانا اے تاکہ او کج علم توں بعد بے علم ہو جُلے بے شک اللہ جانڑنے آلہ تے قدرت آلہ اے
سورت النحل نا رکوع نمبر 9مکمل

اپنا تبصرہ بھیجیں