سورت البقرہ (رکوع 12 تا13) – ہندکو ترجمہ




سورت البقرہ : رکوع 12
97:- دَس چُھڑو کہ جو وی جبرائیل عیہ نا دشمنڑ ہوسی بے شک اُس اِے تُساں نے دِلے بچ لایا اے اللہ نے حُکمے نال اِس نی تصدیق کرنڑیں آلہ جِیڑا اِس توں پہلے اے اور اے ہدیت تے خوشخبری نے ایمان آلیاں وسطے
98:- جِیڑا دشمنڑ اے اللہ نا اُس نیاں فرشتیاں نا اُس نیاں رسولاں نا اور جبرائیل عیہ تے میکائیل عیہ نا تے بے شک اللہ وی کافراں نا دشمنڑ اے ۔
99:- ہاں البتہ اَساں تُساں دار کھلم کھلیاں نشانیان لائیاں او اور اِنہاں صرف نافرمان نِی مَننے او
100:- کیا اینجو ای نی کہ اِنہان جدوں وی وعدہ کیتا اے تے اُساں تَروڑ چھڑیا نے اِنہاں بیچوں اِک ٹولہ اے او ، او بلکل ایمان نی رکھنا او
101:- اور جدوں اِنہاں کول اک رسول آیا اللہ نی طرفوں تے اُس نی تصدیق کرنڑیں وسطے جو کج اِنہاں کول اے اِنہاں سٹ چھڑیا اِک ٹولے اللہ نی کتاباں آپڑیں کنڈی (پیٹھ) پچھے اینجو جینجو او سمجھنے ای نی نوں
102:- اور اُنہاں پیروی کیتی اُس نی جیڑا شیطان سلیمان عیہ کول پڑھنا ایا سلیمان عیہ کفر نیا کیتا پر شیطان کفر کیتا اور لوکاں جادو (ٹونا) سیکھانا اور جو کج بائیبل بچ ہاروت اور ماروت تے لایا اے او نی سکھانا ایا کسے آں وی اور ایتھے تک کہ او آکھنے اَسیں تے صرف آزمائش بچ آں پس توں کفر نہ کر بَس او سِکھنے او کج جِس نال بُدی (بیوی) تے جَڑیں (خاوند) بچ دوری پے جُلے ، اور او نقصان پہنچانڑیں آلے نِی نوں اِس توں کِسے آں صرف اللہ نے حکم نال اور او سیکھنے نوں جو کج اِنہاں نقصان پہنچانا اے اور اِنہاں فیدا نِی دینا ہاں البتہ او سمجھ گئے نوں جو کج اِنہاں کمایا اے اِس وسطے قیامتی والے دیاڑے کج نِی اور بہوں اگلا مَندا اے جِس نے بدلے اُنہاں آپے آں بیچیا اے کاش اُنہاں سمجھ لگ جُلے
103:- اور اگر او ایمان کِن آؤن آ اور ڈرنڑیں والے ہوون آ اللہ کولوں تے اللہ کول اِنہاں وسطے چنگا بدلہ اِیا کاش اِنہاں سمجھ لگ جُلے آ
سورت البقرہ رکوع نمبر 12 مکمل
سورت البقرہ : رکوع 13
104:- اے لوکو جیڑے ایمان کِن آئے او او رَاعِنا نہ آکھو بلکہ اُنّظُرنَا آکھو اور سنڑو اللہ کول کافراں وسطے بہوں ڈاڈا عذاب اے
105:- کتاب والیاں بیچوں جِنہاں کفر کیتا ایا او نی سمجھنے اور نہ ای مشرک کہ تُساں اتے اللہ داروں کوئی چنگی گل لائ جلے اور اللہ جِساں چاہنا اے آپڑیں رحمت نال خاص کر کننا اے اللہ بہوں فضل آلہ اے
106:- کوئی آیت جِساں اسیں پہلا (بھلا) چھڑنے آں اَسیں اُس توں چنگی یا اُس والی گل ای کِن آنڑنے آں کیوں اَساں نی پتا کہ اللہ ہر شئیے (چیز) تے قادر اے
107:- کیوں تُساں نی پتا کہ اللہ وسطے آسمان تے زِمی نی بادشاہی اے اور تُساں وسطے اللہ توں بغیر کوئی حمیتی یامدد گار نی او
108:- کیا تُسیں چاہنے او کہ آپڑیں رسول کولوں سوال کرو اے جئے جئے او جئے سوال اِس توں پہلے موسیٰ عیہ کولوں کیتے گئے اور جیڑے ایمان نے بدلے بچ کفر کننے نوں او سارے پٹھے (الٹے) ہو گئے نوں سدھے راہے توں
109:- بہوں ساریاں کتاباں آلیاں وی اے ای چاہیا کہ او تُساں موڑ کھڑن او ایمان توں بعد کفر دار آپڑیں دِلے نی حبڑاس (حسد) نی وجہ نال اس توں بعد جدوں اِنہاں حق پتا چل گیا اور تُسیں درگزر کرو ایتھے تک کہ اللہ آپڑاں حکم آڑیں بے شک اللہ ہر شئیے تے قادر اے
110:- اور نماز قیم کرو تے زکوٰت دیا کرو تُسیں جیڑی چنگی شئیاں اگاں پیجسو او مل جُلسن نے اللہ کولوں بے شک تُسیں جو کج کرنے او اللہ اُساں دیکھنا اے
111:- اِنہاں آکھیا ایا کہ جنت بچ یہودی تے نصرانی توں بغیر کوئی نی جلنا او اے اُنہاں نیاں کوڑیاں گلاں نوں اُنہاں آکھو کہ تُسیں اگر سچے او تے آپڑیں دلیل کِن آؤ
112:- اور جِیڑے بندے آپڑاں سِر اللہ وسطے یا اُس نے سامنڑیں نِیواں (جھکانا) کرکدا اے او ای نیک اے اُس وسطے اُس نا بدلہ اللہ کول ای اے اِس بندے تے نہ کوئی خوف ہوسی تے نہ ای کوئی غم ہوسی
سورت البقرہ رکوع نمبر 13 مکمل

اپنا تبصرہ بھیجیں