سورت النساء(رکوع نمبر 1 تا 4) – ہندکو ترجمہ




سورت النساء نا رکوع نمبر 1
پارہ نمبر 4 نا رکوع نمبر 12
1:- اے لوکو! اللہ کولوں ڈرو جس تُساں آدم توں پیدا کیتا اے اور اُس توں ای اُس نا جوڑا پیدا کیتا سو اُنہاں توں بہوں سارے مرد عورتاں پھیلائیاں سو اور اللہ کولوں ڈرو جِس نے ناں تے آپس بچ منگنے او اور رشتیاں نا خیال رکھو بے شک اللہ تُساں نا نگہبان اے
2:-اور یتیماں اُنہاں نے مال چا دیو اور حرام آں حلال نال نہ بدلو اور اُنہاں نے مال نہ کھاؤ بے شک اے بہوں بڈا غناہ نے
3:- اور اگر تُساں شک ہووے کے یتیم کُڑیاں نے حق بچ انصاف نی کر کننے او تے جیڑی چنگی لگے اُس نال نکاح کر کِنو دو دو تین تین یا چار چار یا اگر تُساں شک ہووے کہ انصاف نی کر اکنے او تے اِک ای یا جس لونڈی نے تُسیں مالک او اے اس نے نیڑے وے کہ جھک جُلو
4:- اور عورتاں اُنہاں نے مہر خوشی نال چادیو فر اگر او تُساں خوشی نال چھوڑ دیو نوں اِس بیچوں کج تے اِساں چنگا سمجھ کے کھاؤ
5:- اور بے عقلیاں آپڑیں مال نہ دیو جیڑے اللہ تُساں وسطے گزرنا ذریعہ بنڑائے نوں اور اُنہاں اِس بیچوں کھلاؤ پلاؤ اور معقول گل آکھو
6:- اور یتیماں آزمانے رہو ایتھے تک کہ او نکاح نے ٹیم آں پہنچ جُلن او فر اگر اُنہاں بچ صلاحیت پاؤ تے اُنہاں نے مال اُنہاں نے ہوالے کر چھڑو اور ضرورت توں زیادے اُنہاں نا مال نہ کھاؤ اور جلتی اِس خیال بچ کہ اے بڈے ہو جُلسن او اور جیڑا غنی ہوسی اور یتیماں نے مال کولوں بچنا رہسی اور جیڑا حاجت مند ہووے او اصول (قانون) نے مطابق کھاوے فر جدوں اُنہاں نے مال اُنہاں نے ہوالے کرو تے گواہ بُلا کِنو اور اللہ کافی اے حساب کرڑیں آلہ اے
7:- مرداں وسطے حصہ اِس بچ جو کج ماؤ پیو یا رشتے داراں چھوڑیا اے اور عورتاں وسطے وی حصہ اے اِس بچ جو کج ماؤ پیو یا رشتہ داراں چھوڑیا اے خواہ تھوڑا ہووے یا زیادہ پر حصہ مقرر کیتا ہویا اے
8:- اور جدوں حاضر ہوون او تقسیم نے ویلے، رشتہ داراں اور یتیماں اور مسکیناں تے اِس بچ او اُنہاں وی کج دیو اور اُنہاں چنگیاں گلاں آکھو
9:- اور چائی نا اے کہ او لوک ڈرن اگر او آپڑیں پچھے چھوڑ جُلن او ناتواں اولاد ہووے تے اُنہاں اُنہاں نی فکر ہووے پس چائی نا اے کہ او اللہ کولوں ڈرن اور چائی نا اے کہ سدھی گل کرن او
10:-بے شک جیڑے لوک ظلم نال یتیماں نا مال کھانے نوں ہور کج نی بس او آپڑیاں پیٹاں بچ اگ پہرنے نوں اور عنقرین دوزخ بچ جُلسن او
سورت النساء نا رکوع نمبر 1 مکمل
سورت النساء نا رکوع نمبر 2
پارہ نمبر 4 نا رکوع نمبر 13
11:- اللہ تُساں وصیت کرنا اے تُساں نی اولادی نے بارے بچ کہ مرد نے دو حصے نوں عورتاں نے بدلے فر اگر عورتاں ہوون دو یا دوآں توں زیادے تے اُنہاں وسطے دو تہائی اے جیڑا وارثاں چھوڑیا اے اور اگر اک ہووے تے اس وسطے ادھا اے ، اور اِس نے ماؤ پیو وسطے دوآں بیچوں چھیواں حصہ اے اِس بیچوں جو کج اُنہاں چھوڑیا اے اگر اِنہاں نی اولاد ہووے، فر اگر اِنہاں نی اولاد نہ ہووے اور ماں پیو ای وارث ہوون تے اِس نی ماؤ نا تہائی حصہ اے فر اگر اِس میت نے کئی بہن پرا ہوون تے ماؤ نا چھیواں حصہ اے اِ س نی وصیت توں بعد جیڑی اے کر کے گیا وے یا بعد قرضے نی ادا توں تمھارے پیو تے تُساں نے پتر تُساں نی پتا کہ کونڑ تُساں نے فیدے بچ اے اے اللہ نا مقرر کیتا ہویا حصہ اے بے شک اللہ جانڑنے آلہ تے حکمت آلہ اے
12:- اور تُساں وسطے آدھا اے جو تُساں نیاں بیویاں چھوڑ کہ گیانوں اگر اُنہاں نی کوئی کوئی اولاد نی فر اگر اُنہاں نی اولاد ہووے تے تُساں وسطے جو او چھوڑ گیا نوں وصیت بعد چھوتھائی حصہ اے جِس نی او وصیت کر گیا نوں یا بعد ادائے قرض اِس بچ اُنہاں وسطے چوتھائی حصہ اے جو تُسیں چھوڑ جُلو اگر تُساں نی اولاد نہ ہووے فر اگر تُساں نی اولاد ہووے تے جو تُسیں چھوڑ جُلو اِس بیچوں اُنہاں نا آٹھواں حصہ اے اِس وصیت توں بعد جیڑی تُسیں وصیت کر جُلو یا ادائے قرض یا اگر اے جئے مرد نی میراث اے یا اے جئی عورت نی جو کلالہ اے اُس نا ماں پیو نی یا اِس نے بہن پرا ہون تے اُنہاں دوآں نا چھیواں حصہ اے اِس بیچوں فر اگر وہ اک توں زیادہ نوں تے سارے شریک نوں اک تہائی اِس وصیت توں بعد یا ادائے قرض بشرطیکہ کسے آں نقصان نہ پہنچایا ہووے سو اے اللہ نا حکم اے اور اللہ جانڑنے آلہ علم آلہ اے
13:- اے اللہ نیاں مقرر حداں نوں اور جیڑا اللہ اور اِس نے رسول نی اطاعت کرے او اِساں باغاں بچ داخل کرسی جنہاں تلے کھٹے (نہراں) بگنے نوں اور او اِس بچ ہمیشہ رہسن او اور اے بڈی کامیابی اے
14:- اور جیڑا اللہ اور اُس نے رسول نی نافرمانی کرسی اور بد جُلسی اُس نیاں حداں توں او اِس اگی بچ وینجسی اور ہمیشہ رہسی اور انہاں وسطے ذلیل کرنڑیں آلہ عذاب اے
سورت النساء نا رکوع نمبر 2مکمل
سورت النساء نا رکوع نمبر 3
پارہ نمبر 4 نا رکوع نمبر 14
15:- اور تُساں نیاں عورتاں بیچوں جیڑی بدکاری کرنی ہووے اُنہاں اُتے آپڑیاں بیچوں چار گواہ آنڑو فر اگر او گواہی دیون او تے عورتاں گھراں بچ بند رکھو ایتھے تک کہ او مر جلن او یا اللہ کوئی راہ کڈ چھڑے
16:- اور جیڑے دو مرد مرتکب ہوون او تے اُنہاں سزا دیو فر اگر او توبہ کر کنن او اور اصلاح کر کنن او تے اُنہاں چھوڑ دیو بے شک اللہ توبہ قبول کرنڑیں آلہ اے
17:- اِس توں سوا نی کہ توبہ قبول کرنڑاں اللہ نے ذمے اے اُنہاں لوکاں وسطے اے جیڑے غلطی نال برائی کرنے نوں فر جلتی توبہ کر کننے نوں بس اے ای لوک نوں جنہاں نی اللہ توبہ قبول کرنا اے اور اللہ جانڑنے آلہ حکمت آلہ اے
18:- اور اِنہاں لوکاں وسطے توبہ نی او جیڑے غناہ کرنے رہنے نوں ایتھے تک کہ اِنہاں یا اُنہاں کول کِسے آں موت آ جُلنی اے تے آکھنے نوں اسیں ہنڑ توبہ کرنے آں یا جیڑے کفر نی حالت بچ مر جُلنے نوں اے ای لوک نوں جنہاں وسطے اساں ڈاڈا عذاب تیار کیتا اے
19:- اے ایمان آلیو تُساں وسطے حلال نی کہ تُسیں زبردستی عورتاں نے وارث بنڑ جُلو اور نہ روک کہ رکھو اور اِنہاں کولوں دِتا ہویا موڑ کہ کِنو مگر اے کہ او کھلی بے حیائی کرنے آں لگ جُلن او اُنہاں نال گزارا کرو قانون نے مطابق اگر او تُساں نی وی چنگیاں لگنیاں اور عین ممکن اے کہ تُساں اِک شئے (چیز) نہ چنگی لگنی ہووے پر اللہ اُسے بچ تُساں وسطے بھلائی رکھی ہووے
20:- اگر بدلہ چاہو اک بی بی نی جائی دوئی بی بی اور تُساں اُنہاں بیچوں کِسے آں خزانہ دِتا ہووے تے اِس کولوں موڑ کہ نہ کنو کیا تُسیں او کننے او بہتان لا کے اور کھلے غناہ نال
21:- اور تُسیں او کینجو موڑ کہ کنسو البتہ تُساں بیچوں اک دوئے تک پہنچ گیا اے (صحبت کر چکے ہو) اور اُنہاں تے باٹا عہد کیتا
22:- اُنہاں عورتاں نال نکاح نہ کرو جنہاں نال تُساں نے پیو نکاح کیتا اے مگر جو کج پہلے لنگ گیا اے بے شک بے حیائی تے غضب نی گل اے ، اور اے مندا راہ ایا
سورت النساء نا رکوع نمبر 3مکمل
سورت النساء نا رکوع نمبر 4
23:- تُساں اُتے حرام کیتیاں گیاں نوں تُساں نیاں ماواں ، تیاں (بیٹیاں) ، پینڑاں (بہنیں) ، پھپھیاں ، خالائیں ، پتریاں (بھتیجیاں)، پینڑوں نیاں تیاں (بھانجیاں) اور تُساں نیاں رضائی ماواں جنہاں تُساں دودھ پلایا اے اور تُساں نیاں دودھ شریک پینڑاں (بہنیں) اور تُساں نیاں سساں (ساس) اور او تیاں (بیٹیاں) جیڑیاں تُساں پالنے او پئے تُساں نیاں اُنہاں بیویاں بیچوں جنہاں نال تُساں صحبت کیتی اے لیکن اگر تُساں صحبت نی کیتی تے فر غناہ نی تُساں اُتے اور تُساں نیاں پُتراں (بیٹے) نیاں بیویاں (بہو) جیڑے تُساں نے جمے نوں مگر اے کہ تُسیں دو پینڑاں (بہنیں ) جمع کرو مگر جو گزر گیا اے اللہ بخشڑیں آلہ مہربان اے
پارہ نمبر 4 مکمل

اپنا تبصرہ بھیجیں