سورت النساء (رکوع نمبر 4 تا 7) – ہندکو ترجمہ




سورت النساء نا رکوع نمبر 4
پارہ نمبر 5 نا رکوع نمبر 1
24:- اور خاندان آلیاں عورتاں حرام نوں مگر جنہاں نے مالک تُسی ہو جُلو کافراں نیاں عورتاں اے تُساں اُتے اللہ نا حکم اے اُنہاں توں بغیر تُساں تے ساریاں عورتاں حلال نوں بشرطیکہ تُسیں اُنہاں آپڑیں مال نال قید نکاح بچ آنڑنا چاہو نہ کہ ہوس وسطے بس تُساں بیچوں جیڑے اُنہاں توں لذت چاہون او تے اُنہاں اُنہاں نے مقرر کیتے ہوئے مہر دیو اور تُساں اُتے اِس بچ کوئی غناہ نی جِس اُتے تُسیں راضی ہو جُلو اے مقرر کرنے توں بعد بے شک اللہ جانڑنے آلہ تے حکمت آلہ اے
25:- اور جیڑا تُساں بیچوں حثیت (مقدور) نہ رکھے تے او آزاد مسلمان بیویاں نال نکاح جرے جیڑیاں مسلمان کنیزاں تُساں نی ملکیت ہون او اور اللہ تُساں نے ایمان نا پتا اے تُسیں اک دوئے نے ہم جنس او سو تُسیں انہاں نے مالک نی اجازت نال نکاح کر کنو اور اُنہاں اُنہاں نے قانون نے مطابق مہر چا دیو قید نکاح بچ آنڑنے توں بعد نہ کہ مستی کڈڑیں آلیاں اور نہ ای آشنائی کرنڑیں آلیاں چوری یا چھپا کہ بس جدوں نکاح بچ آ جُلن اور فر بے حیائی کرن او تے اُنہاں اُتے آدھی سزا اے جیڑی آزاد عورتاں تے اے اے اِس واسطے کہ جیڑا تُساں بیچوں ڈرے بدکاری نی تکلیف بچ پینڑیں توں اور اگر تُسیں صبر کرو تے تُساں وسطے چنگا اے اور اللہ بخشڑیں آلہ مہربان اے
سورت النساء نا رکوع نمبر 4مکمل
سورت النساء نا رکوع نمبر 5
پارہ نمبر 5 نا رکوع نمبر 2
26:- اللہ چاہنا اے کہ تُساں وسطے بیان کرے تُساں توں پہلے لوکاں نے طریقے تے تُساں ہدیت دیوے اور تُساں نی توبہ قبول کرے اللہ جانڑنے آلہ حکمت آلہ اے
27:- اللہ چاہنا اے کہ او توجہ کرے تُساں اُتے اور جیڑے لوک خواہشات نی پیروی کرنے او چاہنے نوں کہ تُسیں راہے ہدیت تو بہوں زیادے دور پھر جُلو
28:- اللہ چاہنا اے کہ تُساں اُتے بوجھ ہلکا کر چھڑے اور اِنسان کمزور پیدا کیتا گیا اے
29:- اے مومنو آپڑیں مال آپے بچ نہ کھا۳ ناحق مگر اے تُساں نی آپڑیں خوشی نال کوئی تجارت ہووے اور اک دوئے آں قتل نہ کرو اللہ تُساں اُتے مہربان اے
30:- اور جیڑا بندہ اے سرکشی تے ظلم کرسی اُساں اگی بچ سٹ چھڑساں بہوں جلتی اور اے اللہ وسطے بہوں آسان اے
31:- اگر تُسیں بڈیاں غناواں کولوں بچنے رہے او تے اَسیں تُساں نے نِکے غناہ دور کر چھڑساں اور تُساں عزت نے مقام تے پہنچا چھڑساں
32:- اور نہ کرو آرزو اُس نی جیڑی اللہ تُساں بیچوں بعض آں بعض تے دِتی اے بڈیائیں ، اے مَرداں وسطے اُنہاں نے اعمال نا ثواب اے تے کُڑیاں وسطے اُنہاں نے اور اللہ کولوں فضل منگو بے شک اللہ سب کج پتا اے
33:- اور اَساں ہر اِکی وسطے وارث مقرر کیتے نوں جیڑا او مال چھوڑ گیا اے والدین تے رشتہ داراں اور جنہاں لوکاں نال تُساں نا عہد ہو گیا اے اُنہاں اُنہاں نا حصہ چا دیو اور ہر شئے (چیز) نا گواہ اے
سورت النساء نا رکوع نمبر 5 مکمل
سورت النساء نا رکوع نمبر 6
پارہ نمبر 5 نا رکوع نمبر 3
34:- مرد عورتاں اُتے نگران نوں اور اللہ اکی آں دوئے تے فضیلت دتی اے او اِس کر کے کہ اُنہاں آپڑیں مال خرچ کیتے نوں پس جیڑے نیک مرداں نے تابع تے فرمانبردار نوں اُنہاں نی کنڈی پچھے حفاظت کرنیاں نوں اللہ نی حفاظت نال اور گر ڈر ہووئے عورتاں نی بد خوئی نا تے اُنہاں سمجھاؤ اور اُنہاں خوابگاہواں بچ کلا چھوڑ دیو اور اُنہاں مارو اگر تُساں نی گل نہ منن او تے پر اُنہاں اُتے الزام لانڑیں نی راہ نہ لبو بے شک اللہ ساریاں توں اعلیٰ تے بلند اے
35:- اگر تُسیں ڈرو اُنہاں نے درمیان ضد بازی توں تے اک اک منصف مقرر کر چھڑو عورت تے مرد نے خاندان بیچوں تے اگر او دوئے صلح کرنڑاں چاہون او تے اللہ دوآں نے درمیان موافقت کر چھڑسی بے شک اللہ بڈا سیانڑنے آلہ تے باخبر اے
36:- اور اللہ نی عبادت کرو تے اُس نال کسے آں شریک نہ کرو اور چنگا سلوک کرو ماؤ پیو نال اور رشتے داراں یتیماں محتاجاں تے چنگے پڑوسیاں نال اور اجنبی ہمسائے نال اور کول بینڑیں آلے ہم جنس نال اور مسافراں تے غلاماں نال بے شک اللہ سنگی نی رکھنا جیڑا بڑکاں مارڑیں آلہ (اترانے والا ہو ) ہوے
37:- اور جیڑے بخیلی کرنے نوں تے لوکاں سکھانے نوں بخیلی اور او چھپانے نوں جو اللہ اُنہاں آپڑیں فضل نال دِتا اے اور اَساں کافراں وسطے ڈاڈا عذاب تیار کیتا اے
38:- اور جیڑے لوک دکھلاوے وسطے مال خرچ کرنے نوں اور اللہ اور قیامتی آں نی مننے اور جنہاں نال شیطان سنگی اے اور بہوں مندا سنگی اے
39:- اُنہاں نا کہیڑا نقصان ہونا جے او اللہ تے ایمان کن آؤن آ اور قیامتی آلے دیاڑے تے اور اِس بیچوں خرچ کرنے جیڑا اللہ اُنہاں دِتا اے اللہ اُنہاں چنگی طرح سیانڑنا اے
40:- اللہ زرا برابر وی ظلم نی کرنا بلکے کوئی نیکی ہووے تے اُساں کئی گنا بدا چھڑنا اے اور آپڑیں کولوں بڈا ثواب دینا اے
41:- فر کے ٹیم ہوسی جدوں ساریاں امتاں بیچوں اک اک گواہ بلاساں اور تُساں اُنہاں اُتے گواہ بنڑا کے بُلاساں
42:- اُس دیاڑے خواہش کرسن او لوک جنہاں کفر کیتا اور رسول نی نافرمانی ، کاش اُنہاں مٹی بچ دبا کہ زمی برابر کر چھڑن اور او اللہ کولوں کوئی گل نی چھپا اکن
سورت النساء نا رکوع نمبر 6 مکمل
سورت النساء نا رکوع نمبر 7
پارہ نمبر 5 نا رکوع نمبر 4
43:- اے ایمان آلیو نمازاں نے نیڑے نہ جُلے جدوں نشے نی حالت بچ ہوو ایتھے تک کہ جدوں سمجھ لگڑیں آں لگ جُلے نے جو آکھنے او پئے اور نہ ای اِس ٹیم تک جدوں غسل فرض ہووے نے اُس ٹیم تک کہ تُسیں غسل کر نہ رہو ، اگر تُسیں مریض او سفر بچ او یا تُساں بیچوں کوئی بیت الخلاء توں آوے یا عورت نال صحبت کرکے فر اگر تُساں پاڑیں نی ملیا تے پاک مٹی نال تیمم کرو مسح کرو منہ نا تے ہتھاں نا بےشک اللہ معاف کرڑیں آلہ تے بخشڑیں آلہ اے
44:- کیا تُساں اُنہاں لوکاں نی دیکھیا جیڑے گمراہی مول کننے نوں اور چاہنے نوں کہ تُسیں وی پھر جُلو
45:- اور اللہ تُساں نیاں دشمنڑاں ڈاڈا سیانڑنا اے اور اللہ حمیتی تے مددگار جہان اے
46:- بعض یہودی لوک کلمات (الفاظ ) آں بدلی کر چھڑنے نوں اور آکھنے نوں اساں سنڑیاں اے اور نافرمانی کیتی اے اور آکھنے نوں کہ اَساں نی سُنڑو اور راعنا آکھنے نوں آپڑیں جیباں (زبان) واں مروڑ کے طعنے نی نیتاں نال اور اگر او آکھنے کہ اَساں سنڑیا تےاطاعت کیتی اور اَساں تے نظر کرنے تے اُنہاں وسطے چنگا ہووے اور زیادے سنگی ہونا لیکن اللہ نے کفر نے بدلے اُنہاں اُتے لعنت کیتی بس او تھوڑا وی ایمان نی آنڑنے
47:- اے اہل کتاب ایمان آنڑو اُس اُتے جیڑا اَساں لایا اے اُس نی تصدیق کرڑیں آلہ جیڑا تساں نے درمیان اے اِس توں پہلیوں کہ اَسیں بہوں سارے چہرے مٹا چھڑاں فر اُنہاں پٹھا (الٹ) کر چھڑاں یا اَسیں اُنہاں اُتے لعنے کراں جینجو ہفتے آلیاں تے لعنت کیتی اور اللہ نا حکم پورا ہو کے رہنڑیں آلہ اے
48:- بے شک اللہ اُساں نی بخشنا جیڑا اُس نال شریک کرے اور اِس توِ سوا جِساں چاہوے بخش چھڑے اور جِس اللہ نال شریک کیتا اے بے شک اُس بڈا غناہ کیتا اے
49:- کیا تُساں اُنہاں لوکاں نی دیکھیا جیڑے آپڑیں آپے آں مقدس سمجھنے نوں بلکہ اللہ جِساں چاہنا اے مقدس بنڑانا اے اور اُنہاں اُتے کجھوراں نی ہڑیکاں اتنا وی ظلم نی ہونا
50:- دیکھو اللہ اُتے کینجو کوڑ مارنے نوں اور اے ای صریح (کھلا) غناہ اے
سورت النساء نا رکوع نمبر 7 مکمل

اپنا تبصرہ بھیجیں