سورت النساء (رکوع نمبر 12 تا 14) – ہندکو ترجمہ




سورت النساء نا رکوع نمبر 12
پارہ نمبر 5 نا رکوع نمبر 9
87:- سو تُساں کے ہو گیا اے کہ منافقاں نے بارے بچ دو گروہو ہو گئے نو اور اللہ اُنہاں مُندا (اوندھا) کر چھڑیا اے اِس نے بدلے جو کج اُنہاں کیتا اے کیا تُسیں چاہنے او کہ اُنہاں سدھے راہے تے آنڑو اور جِساں اللہ گمراہ کرے تے تُسیں کدے وی اُساں راہے تے نی آنڑ اکنے او
88:- او چاہنے نوں کہ کاش تُسیں وی کافر ہو جُلو جینجو او کافرنوں اور تُسیں برابر ہو جُلو بَس اُنہاں بیچوں کِسے آں سنگی نہ بنڑاؤ ایتھے تک کہ او ہجرت کرن او اللہ نے راہے بچ فر اگر اومنہ موڑن تے اُنہاں پکڑو اور قتل کرو جتھے وی مِلن اے اور اُنہاں بیچوں کِسے آں سنگی نہ بنڑاؤ نہ ای مددگار
89:- مگر جیڑے لوک اُس قوم نال تعلق رکھنے نوں جنہاں نال تُساں نا معائدہ اے یا تنگ ہو گئے نوں اُنہاں نے دِل اِس گل بچ کہ تُساں نال کُلن (لڑیں) او یا آپڑیں قوم نال کُلن او اور اگر اللہ چاہنا تے اُنہاں تُساں اُتے مسلط کر چھڑے آ تے تُساں نال ضرور کُلن آ فر اگر او تُساں توں دور رہون نوں اور نہ کُلن اور صلح نا پیغام پیجن او تے اللہ تُساں واسطے اُنہاں ترساڑیں نی کوئی راہ نی رکھی او
90:- ہنڑ تُسیں او لوک وی دیکھسو جیڑے چاہنے نوں کہ تُساں نال وی تے آپڑیں قوم نال وی امن بچ رہو نوں پر جدنڑ فتنے دار بلایا جُلنا اے تے اِس دار مُڑ جُلنے نوں پر اگر او تُساں توں دور رہو نوں اور صلح نا سنیا (پیغام ) وہ نہ پیجن او اور آپڑیں ہتھ وی نہ روکن او تے اُنہاں پکڑو اور قتل کر چھڑو جتھے وی لبن اے اور اے ای لوک جنہاں اُتے تُساں کھلی سند دتی اے
سورت النساء نا رکوع نمبر 12مکمل
سورت النساء نا رکوع نمبر 13
پارہ نمبر 5 نا رکوع نمبر 10
91:- کسے مسلمان نی شان نی جے او کسے مسلمان آں ای قتل کرے پر اگر غلطی نال ہوجُلے تے اک 1 غلام آزاد کراوے اور خون بہا وارثاں چا دیوے پر اے کہ او وی معاف کر چھڑن او فر اگر او تُساں نی دشمنڑ قوم بیچوں ہووے پر خود مسلمان ہووے تے اک مسلمان غلام آزاد کرے اور اگر اُس قوم بیچوں ہووے جِس نے تے تُساں نے درمیان معائدہ اے تے او خون بہا دیوے اُس نیاں وارثاں اور غلام آزاد کرے پر جساں توفیق (میسر) نہ ہووے تے 2 مہینے لگاتار روزے رکھے تے اے اللہ نی طرفوں اے اور اللہ ای سیانڑنے آلہ تےحکمت آلہ اے
92:- اور جیڑا کوئی جانڑ بجھ کے مسلمان آں قتل کرے تے اُس نی سزا جہنم اے اور ہمیشہ ایتھے رہسی اِس اُتے اللہ نی لعنت تے غضب ہوسی اور اِس وسطے اللہ بہوں ڈاڈا عذاب تیار کیتا اے
93:- اے ایمان آلیو جدوں تُسیں اللہ نے راہے بچ جہاد وسطے سفر کرو تے جیڑا تُساں سلام کرے اُساں کافر نہ آکھو ،تُسیں چاہنے او دنیا نی زندگی نا سامان اللہ کول بہوں غنیمتاں نوں تُسیں اِسے طرح اے او اِس توں پہلے فر اللہ احسان کیتا تے تحقیق کر کنیا کرو اور بے شک تُسیں جو کرنے او اللہ سارا کج پتا اے
94:- بغیر عذر تو بیٹھے رہنڑیں آلے مسلمان تے اور او برابر نی نوں جیڑے اللہ نے راہے بچ آپڑیں مال تے جان نال جہاد کرنے نوں اللہ فضیلت دتی اے بیٹھے رہنڑیں آلیاں اُتے جہاد آلیاں اور ہر اکی آں اللہ چنگا وعدہ دِتا اے اور اللہ مجاھدین آں اجر بچ فضیلت دِتی اے گھر بیٹھے رہنڑیں آلیاں اُتے
95:- اُس نی طرفوں درجے نوں اور بخشش تے رحمت اور اللہ ای بخشڑیں آلہ مہربان اے
سورت النساء نا رکوع نمبر 13مکمل
سورت النساء نا رکوع نمبر 14
پارہ نمبر 5 نا رکوع نمبر 11
96:- بے شک او لوک جنہاں نی فرشتے اِس حال بچ جان کڈ کننے نوں کہ او آپڑیں جانیاں تے ظلم کرنے اے تے فرشتے اُنہاں پچھے نوں کہ تُسیں کس حال بچ اے او او آکھنے نوں کہ اَسیں بے بس اے آں اِس ملخے (ملک) بچ فرشتے آکھنے نوں اللہ نی زمی بہوں بڈے اے تُسیں ہجرت کر جُلو آ تے اے ای لوک نو جنہاں نا ٹھکانڑاں جہنم اے اور او بہوں مندی جا اے
97:- تے جیڑے بے بس نوں مرد عورتاں بچے کہ کوئی کوشش (تدبیر) نی کر اکنے اور نہ کوئی راہ اے
98:- سو امید اے کہ اللہ اُنہاں لوکاں معاف کر چھڑسی اور اللہ تے معاف کرنڑیں آلہ بخشڑیں آلہ اے
99:- اور جیڑا اللہ نے راہے بچ ہجرت کرسی اُساں کشادگی تے کھلی جا (جگہ) مِلسی اور جیڑے لوک گھراں بیچوں اللہ تے رسول صہ دار ہجرت کرکے نکلے نوں اور مَر جُلنے نوں تے اُنہاں نا ثواب اللہ کول اے اور اللہ بخشڑیں آلہ مہربان اے
سورت النساء نا رکوع نمبر 14مکمل

اپنا تبصرہ بھیجیں