سورت المائدہ (رکوع نمبر 5 تا 8) – ہندکو ترجمہ




سورت المائدہ نا رکوع نمبر 5
پارہ نمبر 6 نا رکوع نمبر 9
41:- اُنہاں آدم عیہ نیاں دوآں پتراں نا حال واقعی سنڑاؤ جنہاں نیاز دتی تے اک نی قبول ہو گئی تے دوئے نی نہیں ہوئی اُس دوئے آں آکھیا کہ میں تداں ضرور قتل کرساں اُس آکھیا کہ اللہ صرف ڈرڑیں آلیاں (پرہیزگاروں) نی چیز قبول کرنا وے
42:- البتہ اگر توں ماں (مجھے) قتل کرسیں تے میں فر وی آپڑاں ہتھ قتل وسطے تینڑیں دار نہ بدانا بےشک میں سارے جہان نے اللہ کولوں ڈرنا واں
43:- بے شک میں چاہنا واں کہ توں مینڑیں تے آپڑیں غناہ حاصل کریں تے جہنم آلیاں بیچوں ہو جُلیں اور ظالماں نی اے ای سزا اے
44:- فر اُساں نفس اِس اُتے راضی کر کِدا اور اُس پراؤ آں قتل کر چھڑیا اور نقصان چانڑیں آلیاں بیچوں ہو گیا او
45:- فر اللہ پیجیا اک کاں (کوا) زمی پٹنا تاکہ او اُساں دَسے کہ پراؤ نی لاش کینجو چھپانڑیں سو اُس آکھیا کہ ہائے افسوس میں کاویں (کوے) آلی گل وی نہ جے پراؤ نی لاش چھپاواں تے او پشماناں بیچوں ہو گیا
46:- اِس وجہ توں اَساں بنی اسرائیل بچ لکھ چھڑیا کہ جِس اک جان کِدی دوئی جانی نے بدلے بغیر یا ملک بچ فرساد کرڑیں توں بغیر قتل کیتا تے اُس پورے جہان نا قتل کیتا اے جِس اک 1 بندے آں بچایا اے تے اُس پورے جہان آں بچایا اے اور اُنہاں کول اَساں نے رسول آ گئے نوں روشن دلیلاں کِن کے فر وی اِس توں بعد وی اکثر لوک حد توں بد جُلنے نوں
47:- اے ای سزا اے اُنہاں لوکاں نی جیڑے اللہ تے رسول صہ نال جنگ کرنے نوں تے ملک بچ فرساد پانے نوں اُنہاں قتل کیتا جُلے یا پھانسی دِتی جُلے اُنہاں نے ہتھ تے پیر کَپ چھڑو مخالف سیڈاں توں یا ملک بیچوں کڈو اے دنیا نی رسوائی اے تے آخرت بچ وی بڈا عذاب نے
48:- مگر او لوک کہ جنہاں توبہ کر کِدی اِس توں پہلے کہ تُسیں اُنہاں قابو کرو تے اللہ بخشڑیں آلہ تے مہربان اے
سورت المائدہ نا رکوع نمبر 5 مکمل
سورت المائدہ نا رکوع نمبر 6
پارہ نمبر 6 نا رکوع نمبر 10
49:- اے ایمان آلیو ڈرو اللہ کولوں اور اُس نی قربت لبو اور اُس نے راہے بچ جہاد کرو تاکہ تسیں فلاح پاؤ
50:- جنہاں لوکاں کفر کیتا اے جو کج زمی بچ اے سارا کج اور اتنا ای ہور وی اگر او قیامتی والے دیاڑے عذاب نے بدلے چادیون او تے قبول نی ہونا نے اُنہاں وسطے ڈاڈا عذاب اے
51:- او چاہسن او کہ اگی (آگ ) بیچوں نکل جُلن او پر او ہمیشہ اِس بچ ای رہسن او
52:- چور مرد تے عورتاں نے ہتھ کپ چھڑو اے اللہ نی طرفوں سزا تے عبرت نے اللہ ای غالب تے حکمت آلہ اے
53:- بس جِس ظلم توں بعد توبہ کر کِدی تے اللہ ای توبہ قبول کرنڑیں آلہ تے بخشڑیں آلہ مہربان اے
54:- کیا تُساں نی پتا جے زمی تے آسمان نی بادشاہی اللہ نی اے اور او جِساں چاہوے بخش دیوے یا عذاب دیوے اللہ ہر شئے تے قادر اے
55:- اے رسول صہ تُساں او لوک غمگین نہ کرن او جیڑے کفر بچ جَلتی کرنے نوں او لوک جیڑے منہ نال آکھنے نوں کہ اَسیں ایمان کِن آئے آں پر اُنہاں نے دِل مومن نی نوں اور او جیڑے یہودی ہوئے نوں اور کُوڑ وسطے جاسوسی کرنے نوں او جاسوس نوں اک ہور ٹولے نے اور آپ صہ تک نی آئے ، کلام بدل چھڑنے نوں اور آکھنے نوں کہ اگر تُساں اے دِتا جُلے تے اِساں قبول کرو اور اگر نہیں تے فر بچو اور جِساں اللہ گمراہ کرنڑاں چاہوے تے تُسیں اللہ اَگے اُس وسطے کج نی کر اکنے او اے ای لوک نوں جنہاں وسطے اللہ چاہیا کہ اُنہاں نے دِل پاک کرے اور اُنہاں وسطے دنیا بچ رسوائی تے آخرت بچ ڈاڈا عذاب اے
56:- کوڑ وسطے جاسوسی کرڑیں آلے اگر آپ صہ کول آؤن او تے تُسیں اُنہاں نے درمیان انصاف نال فیصلہ کرو یا منہ پھیر کِنو اے تُساں ن کج نی بگاڑ اکنے اور اگر فیصلہ کرو تے فر انصاف نال کرو بے شک اللہ سنگی رکھنا اے انصاف کرڑیں آلیاں
57:- اور آپ صہ آں کینجو منصف بنڑاسن او اُنہاں کول توریت اے جے اُس بچ اللہ نا حکم اے فر اِس توں بعد اے لوک پھر جُلنے نوں اور اے لوک منڑیں آلیاں بیچوں نی نوں
سورت المائدہ نا رکوع نمبر 6 مکمل
سورت المائدہ نا رکوع نمبر 7
پارہ نمبر 6 نا رکوع نمبر 11
58:- بے شک اللہ تورایت لائی اے اِس بچ ہدیت تے نور اے اِس نے ذریعے اَساں نے نبی حکم دینے نوں فرمانبردار یہود تے علما واں اِس وسطے کہ نبی اللہ نی کتاب نے نگہبان مقرر کیتے گئے نوں اور نگران ، بس تُسیں لوکاں کولوں نہ ڈرو اور آیتاں نے بدلے پیسے نہ کِنو اور جیڑا اِس نے مطابق فیصلہ نہ کرے جو اللہ لایا اے تے اے ای لوک کافر نوں
59:- اور اَساں کتاب بچ فرض کر چھڑیا اے کہ جان نے بدلے جان ، اکھی نے بدلے اکھ ، نَکے نے بدلے نَک ، کَنے نے بدلے کَن ، دنداں نے بدلے دَند اور زخماں نا قصاص (بدلہ) اے فِر جِس معاف کر چھڑیا تے کفارہ اے جیڑا اِس نے مطابق فیصلہ نی کرنا تے اے ای لوک ظالم نوں
60:- اور اَساں عیسیٰ عیہ آں پیراں نے نشاناں تے پیجیا اے اِس نی تصدیق کرنڑیں آلہ جیڑی اُنہاں توں پہلے تورایت اے ای اور اَساں اُنہاں انجیل دِتی جیڑی تصدیق کرنی اے تورایت نی اور اے ہدیت تے نور اے ڈرڑیں آلیاں (پرہیزگار) وسطے
61:- اور انجیل آلے اِس توں فیصلہ کرن جو کج اللہ اِس بچ لایا اے اور جیڑا اِس نے مطابق فیصلہ نہ کرسی تے اے ای لوک نافرمان نوں
62:- اور اللہ آپ صہ داو کتاب سچائی نال لائی اے آپڑیں توں پہلے آلیاں کتاباں نی تصدیق کرنڑیں آلی اِس اُتےنگہبان تے محافظ سو اُنہاں نے درمیان اِس توں فیصلہ کرو جو اللہ لایا اے اور اِنہاں نی خواہشات آں نہ دیکھو اِس توں بعد کہ تُساں حق پتا لگ گیا اے اور اَساں تُساں ساریاں وسطے الگ قانون بنڑایا اے اور الگ راہ اور اگر اللہ چاہنا تے تُساں اک امت (امت واحد) کر چھڑے آ لیکن او چاہنا اے کہ تُساں اِس بچ آزماوے جو اُس لایا اے بس نیکی بچ بَدو تُساں اللہ دار مُڑ کے جُلنا اے او تُساں دسسی جِس بچ تُسیں اختلاف کرنے او
63:- اور اے کہ اُنہاں نے درمیان فیصلہ کرو اِس توں جو اللہ لایا اے اور اُنہاں نی مرضی تے نہ چلو اور اُنہاں کولوں بچو کہ تُساں پھیر نہ کھڑن او اُس کمے توں جیڑا اللہ محمد صہ دار پیجیا اے فر اگر او منہ پھیر کِنسن او تے سمجھ جُلو کہ اللہ اے ای چاہنا اے کہ اُنہاں سزا دیوے اُنہاں نے غناواں نے بدلے اُنہاں بیچوں اکثر لوک نافرمان نوں
64:- اے دور جاہلیت نے رسم و رواج چاہنے نوں پر اللہ توں بہترین حکم کِس نا اے اُنہاں لوکاں وسطے جیڑے یقین رکھنے نوں
سورت المائدہ نا رکوع نمبر 7 مکمل
سورت المائدہ نا رکوع نمبر 8
پارہ نمبر 6 نا رکوع نمبر 12
65:- اے ایمان آلیو ! یہود تے نصاریٰ سنگی نہ بنڑاؤ اُنہاں بیچوں بعض اِک دوئے نے سنگی نوں تے تُساں بیچوں اگر کوئی سنگی بنڑاسی تے او اُنہاں بیچوں ای ہو جُلسی اللہ ظالماں ہدیت نی دینا
66:- بس تُسیں دیکھسو کہ جِنہاں لوکاں نے دِلے بچ روگ اے او اُنہاں دار دوڑسن اور آکھسن کہ اَساں ڈر اے کہ اَساں اُتے خراب ٹیم نہ آ جُلے نیڑے اے کہ اللہ فتح کِن آؤے یا کوئی حکم تے فر جو کج او دِلاں بچ چھپانے نوں تے اِس اُتے پچھتانے رہسن او
67:- اور مومن آکھنے نوں کہ کیا اے او ای لوک نوں جیڑے پکیاں قسماں کھانے کہ او تُساں نال نوں اُنہاں نے تے سارے عمل ٹھکرائے گئے نوں اور اے سارے نقصان چانڑیں آلیاں بیچوں ہو گئے نوں
68:- اے ایمان آلیو تُساں بیچوں اگر کوئی آپڑیں دین تو پھر گیا اے تے اللہ جَلتی ای او قوم آنڑسی جنہاں او چنگا سمجھنا اے اور او مومناں وسطے نرم دِل تے کافراں وسطے باٹے (سخت دِل) اللہ نے راہے بچ جہاد کرنے نوں تے کِسے وی ملامت کرنڑیں آلے نی گلاں کولوں نی ڈرنے اے اللہ نا فضل اے اور او جِساں چاہوے دیوے اللہ وسعت آلہ علم آلہ اے
69:- تُساں نے سَکے (رفیق) تے صرف اللہ اُس نا رسول تے مومن نوں اور او لوک جیڑے نماز پڑھنے نوں زکوٰۃ دینے نوں اور رکوع کرنے نوں
70:- جیڑا سنگی رکھے اللہ اور رسول صہ اور مومناں تے بے شک اللہ نی جماعت ساریاں تے غالب رہسی
سورت المائدہ نا رکوع نمبر 8 مکمل

اپنا تبصرہ بھیجیں